Ijtimoiy ahvoli va turmush sharoiti og‘ir, ishsiz va ijtimoiy faol bo‘lmagan xotin-qizlarni har tomonlama qo‘llab-quvvatlash va ijtimoiy himoya qilish maqsadida Farg‘ona viloyati prokuraturasi organlari tomonidan bir qator ishlar amalga oshirilmoqda.

Xotin-qizlar muammolarini “Ayollar daftari”ni yuritish orqali tizimli ravishda hal etish va ularni ijtimoiy qo‘llab-quvvatlash choralari ko‘rilmoqda.

Xususan, Farg‘ona viloyat prokuraturasi organlari ko‘magida joriy yil boshidan 189 nafar ishsiz xotin-qizlarning bandligi ta’minlandi, 178 nafari hozirda mono markazlarda kasbga o‘qitilmoqda.

Xususan, tadbirkor G.Fozilovaga prokuratura ko‘magida Quva tumani “Turk ravot” mahalla fuqarolar yig‘ini hududidagi foydalanilmay turgan bo‘sh bino ajratib berilishi natijasida ushbu joyda tikuvchilik faoliyati yo‘lga qo‘yilib, sektordagi 30 nafar ishsiz xotin-qizlarning bandligi ta’minlandi.

Viloyat prokurori Ulug‘bek Qosimovning yoshlar va xotin-qizlar bilan o‘tkazib kelinayotgan uchrashuvlarida kelib tushgan murojaatlar asosida sektor hududidagi 2 nafar muhtoj ayollarga nogironlik aravachasi, 2 nafariga tikuv mashinasi olib berilgan, 28 nafari davolanishga yuborilgan, 90 nafariga moddiy va boshqa amaliy yordamlar ko‘rsatilgan.

Qo‘qon va Marg‘ilon shaharlari hamda Uchko‘prik tumanida og‘ir turmush sharoitida yashovchi 3 nafar ayollarning uy-joylari hozirda prokurorlarning tashabbusi bilan ta’mirlab berilmoqda.

Psixolik yordamga muhtoj yoshlar va xotin-qizlarga ruhiy ko‘mak berish maqsadida prokuratura tashabbusi bilan Buvayda tumanida malakali mutaxassislar jalb etilgan holda psixologik yordam ko‘rsatish markazi faoliyati yo‘lga qo‘yildi.