Бухоро вилояти ҳокими вазифасини вақтинча бажарувчи Фарҳод Умаров сайёр қабул ўтказди.

Бухоро шаҳардаги Марказий маданият ва истироҳат боғида ташкил этилган сайёр қабулда секторлар раҳбарлари, вилоят ҳокими ўринбосарлари, ташкилот, муассаса раҳбарлари ва оммавий ахборот воситалари вакиллари қатнашди.

Вилоят раҳбарига фуқаролар томонидан коммунал соҳа, бандликни таъминлаш, қишлоқ инфратузилмасини яхшилаш, банк кредити, уй-жой учун ер ажратиш, уй-жойни кадастрдан ўтказиш, ички йўлларни таъмирлаш ва бошқа масалалар бўйича мурожаатлар бўлди.

Сайёр қабулда мурожаатлар сони икки юздан ошди. Ҳар бир мурожаат диққат билан эшитилиб, ўртага ташланган масалаларни ўз ўрнида, қўшимча ўрганиш талаб этадиган муаммоларни қисқа фурсатда ҳал этиш чоралари кўрилди.

– Айни кунда ишсизман, – дейди фуқаро Мақсад Раҳмонова. – Мазкур масалада мутасаддиларга мурожаат қилдим. Мурожаатим жойида ҳал этилди. “Зиё Текс” ишлаб чиқариш корхонасига ишга қабул қилиндим. Яқинда ишга чиқишим бўйича корхонанинг буйруғи қабул қилинди. Ойлик маошим 700 минг этиб белгиланди. Доимий ишим, даромадим бўлаётганидан хурсандман.