Қорақалпоғистон Республикаси Мўйноқ туманида ишсиз ёшларнинг бандлигини таъминлаш, ердан унумли фойдаланиб, даромад олишга шароит яратиб бериш борасида тизимли ишлар амалга оширилмоқда.

“Мўйноқ келажаги бунёдкорлари” масъулияти чекланган жамияти қишлоқ хўжалиги соҳасига ихтисослашган бўлиб, ёшларни иш ўринлари билан таъминлашга йўналтирилган. Хусусан, бўш турган ер участкалари ва захира ерлар ҳисобидан ажратилган 5 минг гектар ерда сабзавот, полиз ва чорва моллари учун озуқабоп экинларни етиштириш йўлга қўйилиб, ёшларнинг ишсизлик муаммоси бартараф этилмоқда. 

Таъкидлаш жоиз, айни пайтда туманда мазкур йўналишда жами 300 нафарга яқин ёшларнинг бандлиги таъминланган. Улар асосан, ижарачи деҳқон, сувчи, тракторчи, автотранспорт воситалари ҳайдовчиси, ветеринар, зоотехник каби касбларда фаолият юритмоқда.