Андижон вилояти Хонобод шаҳрининг Истиқлол маҳалласида 2 мингдан зиёд дала ҳовли барпо этилмоқда. Улар мустақиллик байрами арафасида фойдаланишга топширилади.

Денгиз сатҳидан 750 метр баландликда жойлашган Хонобод шаҳри ўзининг хушманзараси, гўзал табиати, салқин ва кислородга бой ҳавоси билан нафақат юртдошларимизни, балки хорижий сайёҳларни ҳам мафтун этиб келади.

Ўзбекистон Республикаси Президентининг 2017 йил 16 август “2018-2019 йилларда туризм соҳасини ривожлантириш бўйича биринчи навбатдаги чора-тадбирлар тўғрисида”ги қарори асосида шаҳарда аҳолининг кўнгилли дам олиши, туризмни ривожлантиришга қаратилган кенг кўламли ишлар амалга оширилмоқда. Бу йўналишда “Мадалбеков”, “Андижон макро строй”, “Elegant innovation” масъулияти чекланган жамиятлари томонидан меҳмонхона, дам олиш масканлари, шунингдек, “Хонобод” сиҳатгоҳи ишга туширилди. “Elegant innovation” масъулияти чекланган жамияти экотуризмни тарғиб этиш мақсадида Хитойдан 100 дона велосипед олиб келиб, ижара асосида фойдаланиш имконини яратди.

Шаҳарнинг Истиқлол маҳалласидаги 30 гектар адирлик ҳудудида дала-ҳовлилар қурилаётганлиги эса дам олувчилар ва сайёҳларга катта қулайлик яратади.

Қурилиш ишларини жадаллаштириш мақсадида “Андижонавтойўл” ҳудудий йўллардан фойдаланиш ташкилоти, “Андижон ҳудудий электр корхонаси”, вилоят “Сувоқова” унитар корхоналари томонидан йўллар чиқарилиб, асфальтланмоқда, янги дала-ҳовлилар электр энергияси ва ичимлик суви билан таъминланмоқда.

Мазкур жараёнда хорижий сармоядорлар ҳам фаол иштирок этмоқда. Жумладан, озарбайжонлик инвесторлар томонидан ташкил этилган “Андижон СТС” қўшма корхонасига Германия технологияси асосида 1 минг 200 та дам олиш уйлари барпо этиш учун 85 гектар ер майдони ажратиб берилди.

Айни кунда ушбу объектда 1 минг 500 нафардан ортиқ қурувчи ва мутахассислар, ўнлаб техника воситалари ишламоқда. Уларнинг самарали иш олиб боришлари учун зарур шароитлар яратилган.

Ф.УБАЙДУЛЛАЕВ, З.УМУРЗОҚОВ (сурат), ЎзА