Сирдарё вилояти ҳокими Ғофуржон Мирзаев Ховос тумани Дўстлик маҳалла фуқаролар йиғинида Ховос ва Сардоба тумани аҳолиси учун сайёр қабул ўтказди.

Сирдарё вилояти, Ховос ҳамда Сардоба туманлари ҳокимлари ва уларнинг ўринбосарлари, бошқармалар, бўлимлар бошлиқлари ва бошқа мутасадди ташкилотлари раҳбарлари билан ҳудуддаги вазият, у ерда ечимини кутаётган масалалар атрофлича муҳокама қилинди.

Ховос ва Сардоба туман фуқароларидан 200 нафардан зиёди иштирок этган сайёр қабул аввалида вилоят ҳокимлиги томонидан ногиронлиги бўлган 4 нафар фуқарога ногиронлик аравачалар тақдим этилди.

Вилоят ҳокимига мурожаат қилган фуқароларга Ўзбекистон Республикаси Президентининг Сирдарё вилоятидаги Халқ қабулхонаси мудири Холмирза Қўлдошев, кўтарилган масалага қараб, шу ернинг ўзида тегишли вилоят, туман, шаҳар раҳбарлари қабулига йўналтирди. Бундан ташқари, ушбу қабулгача мурожаат қилмай, бугунги сайёр қабулга тўғридан-тўғри ўз муаммолари билан келганларнинг масалалари ҳам навбат билан кўриб чиқилади.

Сайёр қабулда ўз масалалари билан мурожаат этган 41 нафар фуқароларнинг 12 нафари кўтарган масала қабул жараёни давомида, яъни шу ернинг ўзида тўла қаноатлантирилди. 15 нафар фуқароларга асосли тушунтиришлар берилди. Қолган 14 нафар фуқароларнинг мурожаатлари муддат талаб этганлиги учун назоратга олиниб, ҳал этиш бўйича чора-тадбир ишлаб чиқилди.

Вилоят ҳокимининг ҳудудлардаги сайёр қабули белгиланган жадвал асосида давом этмоқда.

Абдужалол Қаюмов, ЎзА