Нукусда Қорақалпоғистон Республикаси Жўқорғи Кенгеси раиси Аманбай Оринбаевнинг шаҳар ва туманлардаги кўчабошилари, маҳаллалардаги нуроний-оқсоқоллар билан учрашуви ўтказилди.

Унда Жўқорғи Кенгес раиси сўнгги йилларда давлатимиз раҳбарининг Қорақалпоғистонга бўлган алоҳида эътибори билан мамлакатимизда амалга оширилаётган кенг кўламли ислоҳотлар, минтақани ҳар томонлама ривожлантириш бўйича алоҳида қабул қилинган фармон ва қарорлар ҳақида атрофлича сўз юритди.  

Учрашувда асосан фақат Қорақалпоғистон учун 2017 йилдан бери 78 та фармон ва қарор қабул қилиниб, ҳозирги вақтда 38 ҳужжатнинг ижроси давом этаётгани, шунингдек, халқ фаровонлиги йўлида амалга оширилган ишлар, бугунги кунда давом эттирилаётган эзгу ишлар, келгусидаги вазифалар ҳақида ҳам сўз борди.

Таъкидлаш керакки, ўтган йиллар Қорақалпоғистон тарихида алоҳида аҳамиятга эга воқеаларга бой бўлди десак муболаға бўлмайди. Чунки бу қисқа вақт мобайнида кенг кўламли ислоҳотлар амалга оширилиб, бу эзгу ишларнинг амалий натижалари ҳар бир хонадонга етиб бормоқда.

Юқорида қайд этилган фармон ва қарорлар асосида Оролбўйи аҳолиси учун қатор имтиёзлар берилиб, бунинг натижасида аҳолининг ҳаётий муаммоларига ечим топиш, тадбиркорликни қўллаб-қувватлаш, ҳудудни ижтимоий-иқтисодий жиҳатдан ривожлантириш ишлари янги босқичга кўтарилди.

Учрашув якунида маҳаллаларда ҳамжиҳатликни сақлаш, ёшларни она Ватанга садоқат руҳида тарбиялаш, узоқ йиллик ҳаёт тажрибаси билан кўпчиликка ўрнак бўлаётган кўчабошилари Қорақалпоғистон Республикаси Жўқорғи Кенгесининг Фахрий ёрлиқлари билан тақдирланишди.

Шу куни А.  Оринбаевнинг маҳаллалардаги хотин-қизлар фаоллари билан ҳам учрашуви бўлиб ўтди.