Аҳоли мурожаатлари билан ишлаш, фуқароларни қийнаб келаётган муаммоларга ҳуқуқий ечим топиш мақсадида Мажбурий ижро бюроси раҳбарияти томонидан ҳудудларда сайёр қабуллар ташкил этиб келинмоқда.

Тошкент вилоятида тўрт кун давом этган сайёра қабулда 161 нафар фуқаро ҳамда ташкилот вакиллари Бюро директори Музаффар Эгамбердиев томонидан қабул қилинди.

Унда алимент, қарз ва зарар суммаларини ундириб бериш, гаров мулкларини аукцион савдоларига чиқариб берилиши юзасидан, уйга киритиш ҳамда уйдан чиқариш масалалари бўйича мурожаатлар келиб тушди.

Жумладан, Бюронинг Тошкент тумани бўлими иш юритувида бўлган ижро ҳужжати бўйича ундирувчи Г.Сулаймонова 2 нафар фарзандига алимент ундириш масаласида мурожаат қилган. Ўз мурожаатида қарздор узоқ муддатдан буён алимент пулларини тўламай келаётганини билдирган. Сайёр қабул вақтида ижро ҳаракатлари олиб борилиб, қарздор И.Исмаиловдан 36,5 млн. сўм Г.Сулаймоновага сайёр қабул вақтида ундириб берилди.

Шунингдек, Бюронинг Ўртачирчиқ туман бўлими иш юритувидаги ижро ҳужжати бўйича ундирувчи С.Пўлатова 1 нафар фарзандига алимент ундириш масаласида мурожаат қилган.

Ўз мурожаатида қарздор узоқ муддатдан буён алимент пулларини тўламай келаётганини билдирган. Қарздор қидирувга берилгани маълум бўлиб, мазкур ижро ҳужжати назоратга олинди.

Бундан ташқари, “Ипак йўли банк” АТБ ишончли вакили Б.Шерқулов банк кредит қарз суммаларини ундириш юзасидан ижро ҳужжати Бюронинг Чиноз туман бўлими иш юритувида экани, қарздор фуқаронинг гаров мулки бўлган автотранспорт воситасини хатлаш ва аукцион савдоларига чиқариш бўйича мурожаат қилди. Мазкур мурожаат юзасидан ижро ҳужжатидаги ихтиёрий муддат тугаганидан сўнг гаров мулки аукцион савдоларига чиқарилиши тушунтирилган.

Сайёр қабулда 161 нафар аризачидан 85 нафари алимент масаласида, 48 нафари қарз ва зарар ундириш масаласида, 28 нафари эса бошқа масалаларда мурожаат қилган. Шундан 3 та мурожаат жойида ҳал қилиниб, 153 таси қўшимча ўрганиш учун назоратга олинди.

Қолган мурожаатлар юзасидан тушунтиришлар берилди.