Бухоро шаҳридаги Ёшлар марказида “Раҳбар ва ёшлар учрашуви” бўлиб ўтди. Унда вилоят сектор раҳбарлари ёшлар билан учрашди.

Тадбирда вилоят ҳокими Ботир Зарипов сўзга чиқиб, ёшларни Бухоронинг “драйвери” сифатида эътироф этди. Президентимиз томонидан ёшларга оид давлат сиёсатини амалга ошириш бўйича белгилаб берилган вазифаларнинг Бухоро вилоятидаги ижросига тўхталди. Ёшлар билан кўпроқ суҳбат қуриш, уларни тинглаш зарурлигига эътибор қаратди.

–Бугун эртамиз эгалари қайси соҳада бўлмасин, у тадбиркорлик, илм-фан, ҳунармандчиликда ўз ўрнига эга,  – деди Ботир Зарипов. – Улар ўз соҳалари ривожига салмоқли ҳисса қўшмоқда. Қолаверса, улар вилоят иқтисодиётини ҳаракатга келтирувчи кучга айланмоқда. Бухоролик ёшлар бугун илм-фанда илғор, улар замонавий фикр, креатив ташаббусларга эга. Улар кичик бизнесдан тортиб йирик инвестицион лойиҳаларни ҳам амалга оширмоқда.

Тадбирда ёшлар таълим-тарбиясига қаратилаётган эътибор ва ғамхўрликнинг ёрқин намунаси сифатида бухоролик йигит-қизлар қўлга киритаётган муваффақиятлар алоҳида эътироф этилди.

Ботир Зариповнинг ёшлар билан учрашуви  ташаббусларга бой бўлди. Учрашув йигит-қизларга ўзига хос мотивация берди.