Давлатимиз раҳбари топшириғига асосан Президент маслаҳатчиси ўринбосари – Халқ қабулхонаси раҳбари Улуғбек Муҳаммадиев бошчилигида Республика ишчи гуруҳи Қорақалпоғистон Республикасида ўз ишини бошлади.

Республика ишчи гуруҳи таркибига Президент Администрацияси масъул ходимлари, Қорақалпоғистон Республикаси Вазирлар Кенгаши, Президент Халқ қабулхонаси, секторлар раҳбарлари, вазирлик ва идора вакиллари бириктирилди. 

Натижада томорқа хўжалигини ташкил қилиш, «Сайхунобод тажрибаси» асосида тадбиркорликни ривожлантириш ва шу каби бошқа бир қатор масалаларга эътибор қаратилди. 

Хусусан, «маҳаллабай» тамойили асосида ҳудуддаги 403 та МФЙда аҳоли муаммоларини ўрганиш ишлари амалга оширилди. Натижада икки кун ичида ички йўлларни таъмирлаш учун 2 километр асфальт ётқизиш ишлари амалга оширилди. Электр таъминотини яхшилаш мақсадида 5 та ТПлар таъмирланди, 31 та симёғоч алмаштирилди, 20 та қўшимча устун ўрнатилди, 1 километрдан зиёд СИП кабеллар, 25 та тунги ёритиш чироқлари янгиланди. 

Бундан ташқари. 3 километр ичимлик суви тармоғи тортилди, 1,8 километр тармоқ таъмирланди. Газ таъминотини яхшилаш мақсадида 28 та ГРПлар, табиий газ тармоқлари таъмирланди ҳамда 2 мингдан зиёд суюлтирилган газ балонлари аҳолига етказиб берилди. 

Аҳоли бандлигини таъминлаш, оилавий тадбиркорликни ривожлантириш мақсадида, жами 381 нафар ёшларга 6,1 миллиард сўм миқдорида имтиёзли кредит ажратилиши таъминланди. 

Муборак Қурбон ҳайити кунлари кам таъминланган оилалар, боқувчисини йўқотган фуқаролар, ёлғиз кексаларга, «Меҳрибонлик», «Мурувват» ва «Саховат» уйларига ёрдамлар кўрсатилди. Шу билан бирга, 36 нафар етим ва ота-она қарамоғидан маҳрум бўлган болаларга уй-жойлар топширилди. 

Аҳоли саломатлигини сақлаш ва мустаҳкамлаш мақсадида Қорақалпоғистон Республикасидаги 16 та туманда жами 180 нафар фуқаро тиббий кўрикдан ўтказилиб, 7 нафар беморга бепул жарроҳлик амалиётлари ўтказилди. 

Республика ишчи гуруҳи фаолиятининг яна бир муҳим йўналиши жойларда маънавий-маърифий муҳитни яхшилашдир. 

Ушбу мақсадда «маҳалла еттилиги» билан ҳамкорликда жойларда 50 дан зиёд турли тадбирлар ташкил этилди. Хонадон маданиятини юксалтириш, оилаларда фарзанд тарбияси, ота-она ва фарзанд муносабатлари, оилавий тадбиркорликни йўлга қўйиш, касаначиликни ривожлантириш, «Уч авлод учрашувлари», маънавият ва китобхонликни тарғиб қилиш, спорт тадбирлари шулар жумласидандир. 

Республика ишчи гуруҳи фаолияти давом этмоқда.