Янги Наманган туманида оилаларнинг даромад манбаини яратиш, ўзини ўзи банд қилиш орқали камбағалликдан чиқариш чоралари кўрилмоқда. Айниқса, хотин-қизларни уй шароитида ишлаб, пул топиши учун зарур шароит яратилаётир.

Туманнинг “Ёшлик” маҳалласида яшовчи Нигора Мирхожаева яратилган имкониятлардан фойдаланиб, уй шароитида ширинликлар тайёрлаш фаолиятини йўлга қўйди. У ўзини ўзи банд қилибгина қолмай, 3 нафар қўшни аёлларни-да иш билан таъминлади. Ҳозирда улар 3 турдаги тайёр маҳсулот, 5 турдаги ярим тайёр маҳсулотни халқимиз дастурхонига етказиб бермоқда. Бу юмуш орқали аёллар бир кунда ўртача 150 минг соф даромад топмоқда. Ишбилармон аёл бунга қўшимча равишда инкубация усулида парранда ҳам кўпайтиради. Айни пайтда хонадонида 155 та жўжа ва 25 та товуқ парвариш қилинмоқда. 

Шу маҳаллада яшовчи Наимахон Отабоева ҳам оилавий тадбиркорлик фаолияти йўлга қўйиб, қўшни аёллардан 6 нафарини иш билан таъминлади. Бундан ташқари, касаначилик асосида ҳам 5 нафар аёлга уйига иш беради. Тадбиркор аёл ташкил этган кичик цехда тикилаётган эркаклар кўйлаги ички бозорга етказиб берилмоқда. Шу билан биргаликда, аёллар учун турли бичимдаги либослар ҳам тикилмоқда. Муҳими хотин-қизлар уй шароитида фойдали меҳнат билан банд ҳамда ойига 3-4 миллион даромад топмоқда. 

– Ўтган йили “Аёллар дафтари”да қайд этилган хотин-қизларнинг барчасини рўйхатдан чиқаришга эришдик, - дейди Янги Наманган тумани хотин-қизлар бўлими бошлиғи Нигора Мирзавалиева. – Уларнинг 698 нафари касб-ҳунарга ўқитилди, 140 нафарига субсидия асосида зарур иш анжомлари олиб бердик. 428 нафарига эса имтиёзли кредит ажратилди. Бугун бу опа-сингилларимизнинг барчаси кафолатланган даромад манбаига эга. Ижтимоий ҳаётдаги фаоллиги ҳам ошган. 

Мустақилликнинг беш йиллиги маҳалласида яшовчи Турдихон Усмонова ҳам ёлғиз оналиги боис “Аёллар дафтари” рўйхатига олинган эди. Ўзи тиришқоқ, интилувчанлиги қўл келиб, тикувчилик ортидан рўзғорини бутлаяпти. У ҳозирда ўқувчилар учун мактаб формаси ва буюртма асосида аёллар либослари тикмоқда.

– Аввалига 1 та тикув машинаси билан иш бошлагандим, - дейди тикувчи. – Имтиёзли кредитга яна 1 та дастгоҳ олиб беришди. Иш кўлами кенгайиб, сафимиз 5 кишига етди. Туманда оилаларнинг соғлом ва барқарор ижтимоий-маънавий муҳити ҳамда тинчлиги ва осойишталигини сақлаш юзасидан қатор ишлар амалга оширилмоқда. 

Айрим оилалардаги мавжуд нотинч маънавий-руҳий муҳит натижасида содир бўлаётган никоҳдан ажралишларни олдини олиш мақсадида маънавий-маърифий тадбирлар ва давра суҳбатлари ўтказилмоқда.