Самарқанд вилоят суди раиси Олим Ҳайитовнинг навбатдаги сайёр қабули Самарқанд шаҳрида ўтказилди.

Қабулда вилоят суди ҳамда Жиноят ишлари бўйича Самарқанд шаҳар суди судьялари иштирок этди. 

64 ёшли М.Ваҳобова вилоят суди раисига мурожаат қилиб, Туркия давлатига борганида қонунни билмаганлиги учун хорижий давлатларга кириш-чиқиш тартибларини бузганлиги, бунинг учун қонуний жазо олиб, озодликдан чеклаш жазосини ўтаётганлигини билдирди. Бугунги кунда қилмишининг оқибатларини тушуниб етганлиги, пушаймонлиги ва тегишли хулоса чиқарганлигини инобатга олиб, жазонинг қолган қисмидан озод қилишни сўради. Яна 24 нафар фуқаро шу мазмунда мурожаат қилди. 

Шу ерда Жиноят ишлари бўйича Самарқанд шаҳар судининг сайёр суд мажлиси ташкил этилиб, ҳар бир ҳолат алоҳида кўриб чиқилиб, мурожаатлар ижобий ҳал этилди.

Умуман, қабул давомида фуқаролардан жиноят, фуқаролик, иқтисодий ва маъмурий масалалар юзасидан 32 та мурожаат тушди. Шундан қонунга мувофиқ келадиганлари ижобий ҳал қилинди ва қолганларига ҳуқуқий тушунтириш берилди.