Мамлакатимизда ўғил-қизларнинг болаликдан жисмонан соғлом, маънан баркамол этиб улғайтириш доимий эътиборда. Юртимизнинг энг олис, чекка ҳудудларида ҳам давлат ва нодавлат мактабгача таълим ташкилотлари барпо этилиб, замонавий усулда жиҳозланаётгани ушбу эзгу мақсад йўлидаги саъй-ҳаракатлардан.

Сирдарё вилояти Боёвут туманининг Бобоюрт ҳамда Муқимий маҳаллаларида ҳам янгидан барпо этилган 12- ҳамда 18-давлат мактабгача таълим ташкилоти фойдаланишга топширилди.  

Шу муносабат билан ташкил этилган маросимларда туман ҳокими Дилфуза Уралова, ҳоким ўринбосарлари, мактабгача ва мактаб таълими бўлими масъуллари, нуронийлар ва кенг жамоатчилик вакиллари иштирок этди.

Инвестиция дастури доирасида таъмирланиб, қайта қурилган ҳар иккала муассасада замонавий мусиқа зали, ошхона, шинам ётоқхона ва ўйин майдончалари барпо қилинди ҳамда зарур жиҳозлар билан таъминланди. Болажонларнинг ҳар бир куни мазмунли ўтиши учун барча шароитлар яратилди.

Маросимда сўз олганлар юртимизда ёш авлоднинг соғлом, маънан етук инсонлар бўлиб улғайиши, замонавий билимларни пухта эгаллаши учун яратилаётган шарт-шароитлар ҳақида гапириб, бу ишларнинг давомий бўлишига тилак билдирди.