Янги йил байрами арафасида Самарқанд вилоятининг Каттақўрғон туманида бир қатор ижтимоий соҳа объектлари фойдаланишга топширилди.

Якунига етаётган йилда туманда 28 та ижтимоий соҳа объектида қурилиш-монтаж ишлари олиб борилди. Бу мақсадлар учун қарийб 50 миллиард сўм маблағ сарфланди.

Жумладан, 12 та умумтаълим мактаби замон талабларига мослаштирилиб, ўқувчиларнинг сифатли таълим олиши учун кенг имкониятлар яратилди. 8 та мактабгача таълим ташкилоти фойдаланишга топширилди. 2 та умумтаълим  мактабида замонавий спорт зали, 2 та умумтаълим  мактабида фаоллар зали ва кутубхона қурилди.

Туман аҳолисига тиббий хизмат кўрсатиш сифатини янада ошириш мақсадида 2 та оилавий шифокорлик пункти, тез тиббий ёрдам кўрсатиш бўлими бунёд этилди, 1 та оилавий шифокорлик пункти капитал таъмирланди.

– Бу каби қурилиш-бунёдкорлик, ободонлаштириш ишлари халқимиз фаровонлигига, улар учун муносиб турмуш шароити яратишга қаратилган, – дейди Каттақўрғон тумани ҳокими Жамшид Насриддинов. – Келгуси йилда бундан ҳам кўп объектлар қуришни режалаштирганмиз. Халқимиз ҳамжиҳат бўлиб, амалга оширилаётган ислоҳотларни қўллаб-қувватласа, ёнимизда турса, бундан ҳам юқори натижаларга эришамиз, албатта.