Юртимизда куз-қиш мавсумига ҳозирлик кўрилмоқда. Ижтимоий соҳа объектлари, таълим ва тиббиёт муассасаларини мавсумга тайёрлашга алоҳида эътибор қаратилмоқда.

Бажарилаётган ишлар билан танишиш мақсадида Олий Мажлис Сенати аъзолари ва маҳаллий Кенгашлар депутатларидан иборат ишчи гуруҳ Самарқанд вилояти туман ва шаҳарларида бўлиб, ҳақиқий ҳолатни ўрганмоқда. Жумладан, Олий Мажлис Сенати аъзоси Фарҳод Боқиев бошчилигидаги ишчи гуруҳ Жомбой туманида бўлиб, ҳудудда 2023-2024 куз-қиш мавсумига тайёргарлик ишларининг бориши билан танишди.

Тумандаги 24-умумтаълим мактабида мавсумга ҳозирлик доирасида таълим даргоҳининг ўқув хоналарини иситиш учун кўмир ёқилғиси билан қиздириладиган қозонхона техник кўрикдан ўтказилиб, соз ҳолатга келтирилган. Ҳозирча 10 тонна кўмир захираси шакллантирилган. Мактаб биносида 15 кВт қуёш панеллари ўрнатилган ва ундан самарали фойдаланилмоқда.

Ишчи гуруҳ аъзолари қуёш панели ва аккумулятори билан жиҳозланган 30-сонли мактабгача таълим ташкилотининг моддий-техник базаси, кичкинтойлар таълим-тарбия оладиган хоналарни иситишга мўлжалланган батареялар ҳолатини кўздан кечирди.

Сенатор ва депутатлар туманнинг Алишер Навоий маҳалласида ҳам бўлиб аҳоли хонадонларида куз-қиш мавсумига тайёргарлик борасида маҳалла аҳли билан суҳбатлашди. Уларнинг коммунал хизматлар билан боғлиқ муаммо ва таклифларни эшитиб, камчиликларни бартараф этиш бўйича чора-тадбирлар белгиланди. Маҳалладаги хонадонларга қуёш панеллари ўрнатилиши, унинг имкониятлари, афзалликлари юзасидан хонадон эгалари билан мулоқот уюштирилди.  

Ишчи гуруҳ Тойлоқ туманида ҳам мавсумга тайёргарлик жараёнларини ўрганиб, мутасаддиларга зарур тавсиялар берди. Шунингдек, “Кўмир таъминот” масъулияти чекланган жамиятининг вилоят филиалига қарашли кўмир омборлари фаолияти ўрганилди.