Бугунги кунда давлат идоралари раҳбарларининг халқ ичига кириб бориши, фуқароларнинг кундалик ҳаётдаги мавжуд муаммоларига қонун доирасида ечим топиб, амалий ёрдам кўрсатиши, ҳуқуқ ва манфаатларини ҳимоя қилиб, адолат мезонини қарор топтириши эътибордаги муҳим вазифаларидан бирига айланди.

2016 йил 28 декабрдаги «Жисмоний ва юридик шахсларнинг мурожаатлари билан ишлаш тизимини тубдан такомиллаштиришга доир чора-тадбирлар тўғрисида»ги фармон ижросини таъминлаш, тизимда халқ билан мулоқот ва инсон манфаатларини ҳимоя қилиш механизмини такомиллаштириш мақсадида йўлга қўйилган сайёр қабулхоналарга мурожаат қилаётган фуқаролар муаммосига ечим топганидан миннатдорлик ҳиссини туймоқда.

Бу галги қабулда Андижон туманининг Найман маҳалласида истиқомат қилаётган 60 ёшли Гавҳарой она Тожибоеванинг ҳам юз-кўзидан ана шундай қувонч порлаётганини кўриб, уни суҳбатга чорладик.

«Ўғлим Ҳикматилло Усмонов шу йил Қарши шаҳрида муддатли ҳарбий хизматни ўтаб келди. Фарзандларимдан бирини ички ишлар соҳасида ишлашини орзу қилардим. Бу мақсад ўғлимда ҳам йўқ эмас эди. Бугун вилоят ИИБ бошлиғининг қабулига кирдим. Мурожаатимиз қисқа фурсатда ечим топди — Ҳикматилло Андижон шаҳар ИИОФМБнинг қўриқлаш бўлимида фаолият юритадиган бўлди. Бундан бутун оила аъзоларимиз жуда ҳам хурсандмиз».

Шаҳрихон туманида яшовчи Фарҳодбек Салимов 30 ёшда. У акасининг синфдош дўсти Иқбол Юнусовнинг ваъдаларига учиб, шу йилнинг февраль ойида Россияга ишлаш учун жўнаб кетади. Уч ой тер тўкиб, меҳнат қилган Фарҳодбек ҳалигача маҳалладошидан хизмат ҳақини ололгани йўқ. Умидини узмаган бу йигит ҳам ўз муаммосига ечим топиш ниятида қабулга келибди. Унинг мурожаати ИИБ ходимлари томонидан тингланиб, ҳолат юзасидан тегишли ҳужжатлар расмийлаштирилди. Кун давомида Фарҳодбек сингари 30 нафарга яқин фуқаро турли масалаларда мурожаат қилди.

Шу ўринда қайд этиш жоизки, бошқарма ва унинг шаҳар, туман бўлимлари раҳбарлари томонидан ҳам жисмоний ва юридик шахсларнинг қабули йўлга қўйилган. Ҳар жиҳатдан қулай, тезкор, самарали бўлган сайёр ва виртуал қабулхоналар имкониятларни кенгайтириб, аҳолининг ички ишлар органларига ишончини янада мустаҳкамлашга хизмат қилмоқда. Мазкур қабулхоналарга тушаётган мурожаатлар юзасидан тезкор ўрганиш ва суриштирувлар олиб борилиб, аксарияти ўша заҳоти жойида, текширишни талаб этадиган мурожаатлар эса қатъий назорат остида белгиланган муддатларда ҳал этиляпти.

Вилоятнинг Пахтаобод, Бўз, Улуғнор, Қўрғонтепа, Балиқчи, Избоскан, Асака ва Жалақудуқ туманларида ўтказилган сайёр қабулда фуқаролар томонидан 378 та масала кўтарилган. Шундан 354 таси жойида ечим топган, 24 таси эса қўшимча ўрганиш ўтказиш орқали кўриб чиқилиши таъминланган.

Халқ билан мулоқот қилиш орқали одамлар қалбидаги орзу-мақсадларнинг амалга ошишига кўмаклашиш, муаммоларини ўрганиб, камчиликларини бартараф этиш, ижтимоий муҳофазага муҳтож инсонларни ҳимоялаш каби эзгу сайъ-ҳаракатлар давом этмоқда. Вилоят ИИБ ва унинг барча туман-шаҳар бўлимлари эшиклари мурожаатчилар учун ҳамиша очиқ.

Миролим Исажонов, «Дарё» муҳбири