Наманган вилоятининг Тўрақўрғон тумани марказида 8 та кўп қаватли уй фойдаланишга топширилди.

Шу муносабат билан ўтказилган тадбирда вилоят, туман ҳокимлиги, давлат ва жамоат ташкилотлари мутасаддилари, фахрийлар, ёшлар ва кенг жамоатчилик вакиллари иштирок этди.

Тўрақўрғон туманида ҳам охирги икки йилда кенг кўламли бунёдкорлик ишлари амалга оширилмоқда. Жумладан, туман марказидан ўтган сой соҳилида барпо этилган Исҳоқхон Тўра Ибрат мемориал-ёдгорлик мажмуаси бугун вилоятнинг энг кўркам, йирик маънавий-маърифий, ижтимоий аҳамиятга эга масканларидан бирига айланди. 

Сойнинг бошқа соҳилида давлатимиз раҳбари тавсиялари асосида замонавий инфратузилма объектлари, супермаркет ва бошқа савдо, маиший хизмат иншоотлари, кам таъминланган оилалар учун кўп қаватли арзон уйлар қад ростлади. Қисқа муддатда бу ерда “Равнақ”, “Қурувчи”, “Калистро”, “Сардорбек Арслонбек транс”, “Баркамол таъмир бутлаш”, “Қосимон қурилиш савдо” каби ўнлаб қурилиш корхоналари томонидан умумий қиймати 20 миллиард сўмликдан зиёд қурилиш-монтаж ишлари бажарилиб, ҳар бири 192 та хонадонга мўлжалланган 8 та кўп қаватли уй бунёд этилди. 

Тадбирда янги хонадонлар калити эгаларига топширилди. 

– Замонавий уйларда айниқса, биз каби ногирон инсонлар учун қулайликлар яратилгани қувонарлидир, – дейди “Жасорат” медали соҳибаси Ф.Шерматова. – Мен энди аравачада ҳам уйнинг барча хоналарида бемалол ҳаракатлана оламан, ошхонада қийинчиликсиз ўзим овқат тайёрлай оламан. Уй имтиёзли равишда берилди. Бунинг учун Президентимиздан беҳад миннатдормиз. 

Тадбирда Наманган вилояти ҳокими Х.Бозоров сўзга чиқди. 

Акромжон Сатторов, Ҳотам Мамадалиев (сурат), ЎзА