Фарғона вилояти Бешариқ туманида вазирлик ва идора раҳбарларидан иборат Республика ишчи гуруҳи ижтимоий-иқтисодий соҳаларда йиллар давомида йиғилиб қолган муаммоларни яқиндан ўрганди. Ўрганиш ишлари 4 та сектор кесимида 62 та маҳаллани қамраб олди.

Ишчи гуруҳ томонидан иккинчи сектордаги 9 мингдан ортиқ хонадонлар тўлиқ ўрганилди. Бу жараёнда 3 минг 200 дан ошиқ муаммолар аниқланиб, 2 минг 350 таси ижобий ҳал этилди.

Хусусан, “Пастки Янгиқўрғон” МФЙда 3 мингдан ошиқ аҳоли истиқомат қилади. Маҳаллада куз-қиш мавсуми бошланиши билан электр энергияси таъминоти издан чиқиши одатий ҳол эди. Бу муаммони бартараф этиш мақсадида 83 дона темир-бетон таянчлар ўрнатилиб 3,7 км тармоқ тортилди ва янги трансформатор ўрнатилди. Натижада маҳалланинг электр таъминоти яхшиланди.

“Адолат” МФЙда эса кўп йиллардан буён кузатилаётган тоза ичимлик суви муаммоси ўз ечимини топиб, хонадонлардаги жўмракларда зилол сув оқа бошлади.

Республика ишчи гуруҳи саъй-ҳаракати билан ички йўлларни таъмирлаш, аҳолига суюлтирилган газ баллонлари, кўмир етказиш, тиббий кўриклар ташкил этиш, фуқароларга кадастр ҳужжатларини расмийлаштириш, банк кредити олиш, алимент тўловларини ундиришга кўмаклашиш, “Аёллар дафтари”даги хотин-қизлар муаммоларини ўрганиш ишлари ўзининг амалий натижасини бермоқда.