Бош вазир ўринбосари – Оила ва хотин-қизлар давлат қўмитаси раиси Зулайҳо Маҳкамова Сирдарё туманида портлаш содир бўлган ҳарбий қисм яқинида жойлашган "Илғор" маҳалласида бўлиб, маҳалланинг "Оқила аёллар" ҳаракати аъзолари билан учрашди.

Маҳалладаги кам таъминланган, ижтимоий ҳимояга муҳтож оилалар ҳолидан хабар олинди. Яхшигул момо Шакарова, Шаҳрибону момо Қўшоқова хонадонларида аёллар билан суҳбат қурилди.

Маҳалладаги 23-умумтаълим мактаби кутубхонасига борилиб, оилаларда китобхонлик маданиятини ошириш бўйича фикрлашилди.

Бош вазир ўринбосари Мирзаобод тумани “Йўлдошобод” маҳалласида содир этилган қасддан баданга оғир шикаст етказиш жинояти юзасидан муҳокама йиғилишида иштирок этди.

Муҳокама йиғилишида секторлар вакиллари, вилоят прокуратураси, вилоят ИИБ, туман ҳокимлиги, Оила ва хотин-қизлар бўлими, "Оқила аёллар" ҳаракати аъзолари ҳамда кенг жамоатчилик вакиллари иштирок этди.

Муҳокамада жиноятни келтириб чиқарган сабаб ва омиллар ҳақида сўз борди. Келгусида шунга ўхшаш ҳолатлар содир этилишининг олдини олиш, бу борада маҳалла ва тегишли ташкилот вакиллари ҳушёрлигини ошириш лозимлиги таъкидланди.