Қорақалпоғистон Республикаси Жўқорғи Кенгеси Раиси А.Оринбаев томонидан Нукус шаҳри аҳолиси учун навбатдаги оммавий қабул ўтказилди.

Қабулда асосан, аҳолини ижтимоий қўллаб-қувватлаш, тадбиркорлик фаолиятидаги муаммолар, бандлик, тиббий ёрдам, электр энергияси ва табиий газ таъминоти, ичимлик ва оқова сув етказиб бериш каби масалалар бўйича мурожаатлар бўлди.

Жумладан, “Қутли қонис” маҳалла фуқаролар йиғинида истиқомат қилувчи Гулноз Айтимбетованинг турар жойи том қисмини таъмирлаш бўйича мурожаати ижобий ҳал этиладиган бўлди. Гулжайна Айназарованинг иккинчи мутахассислик бўйича шартнома пули тўлиб берилиб, ишга жойлаштирилди. Айгул Жуманазарова ҳамда Салтанат Тўлегенованинг турар жойларини таъмирлаш бўйича маблағ ажратилган бўлса, Майрамгул Мадреймовага моддий ёрдам пули бериладиган бўлди.

Фуқароларнинг 300 дан зиёд мурожаати қабул қилинди. Уларнинг аксарияти жойида ижобий ҳал этилди. Вақт талаб этиладиган мурожаатлар тегишли соҳа раҳбарларига топширилди ва ижроси Қорақалпоғистон Республикаси Жўқорғи Кенгеси Раиси томонидан назоратга олинди.

Ҳар бир мурожаат ортида инсон тақдири бор. “Инсон қадри учун” тамойилини ўзида мужассам этган оммавий қабуллар туманларда ҳам бўлиб ўтади.

Қабулда Ўзбекистон Республикаси Президенти маслаҳатчиси биринчи ўринбосари У.Муҳаммадиев иштирок этди.