15 октябрь — Халқаро қишлоқ аёллари куни. Шу муносабат билан жойларда турли тадбир ва учрашувлар, сайёр қабуллар ташкил этилмоқда.

Бундай тадбирларда қишлоқ аёлининг сабр-матонати, меҳнаткашлиги, оилапарвар ва садоқатли эканлиги алоҳида эътироф этилаётир. Шу билан бирга, уларнинг ташвишлари, муаммолари, ижтимоий ҳолати, саломатлиги ўрганилмоқда. 
  
Халқаро қишлоқ аёллари кунига тайёргарлик кўриш ва уни юқори савияда ўтказиш мақсадида Тошкент вилояти Бўстонлиқ туманининг Нанай қишлоғида “Қишлоқ аёллари билан бир кун” мавзусида тадбир бўлиб ўтди. 
  
Унда Ўзбекистон Республикаси Олий Мажлиси Қонунчилик палатаси депутатлари, Ўзбекистон Халқ демократик партияси Марказий Кенгаши ҳамда Тошкент вилояти ва Бўстонлиқ туман кенгашлари масъуллари, Бўстонлиқ туман тиббиёт бирлашмаси, туман оила ва хотин-қизлар билан ишлаш бўлими вакиллари иштирок этди. 
  
Тадбир доирасида турли мутахассисликларга эга тиббиёт ходимларидан иборат жамоа ёрдамида Жаҳонобод қишлоқ оилавий поликлиникасида кам таъминланган 50 нафардан зиёд аёл ҳамда аҳоли вакиллари бепул тиббий кўрикдан ўтказилди. Уларга шифокорлар томонидан тиббий маслаҳат ва соғлиқларини тиклашлари учун йўлланмалар берилди. 

Бундан ташқари, тадбир доирасида сайёр қабул ташкил этилиб, унда аҳолини қийнаётган муаммолар ўрганилди. 
  
— “Қишлоқ аёллари билан бир кун” лойиҳаси доирасида нанайлик хотин-қизлар билан яқиндан суҳбатлашдик, дардлашдик, уларни ўйлантираётган муаммолар билан танишдик, — дейди Қонунчилик палатаси депутати Қизилгул Қосимова. — Оғир ижтимоий вазиятга тушиб қолган, кўмакка муҳтож ва “Аёллар дафтари”га киритилган хотин-қизлар ҳолидан хабар олиб, уларга қандай амалий ёрдамлар кўрсатилаётганини ўргандик. Ўрганишларимиз давомида аниқланган қатор масалалар юзасидан тегишли мутасаддилар билан келгусидаги ишларимизни белгилаб олдик. 
  
Бу каби учрашув ва мулоқотлар турли шарт-шароитдаги қишлоқ аёлларининг оғирини енгил қилиш, муаммоларини ҳал этиш, кўнглини кўтаришга хизмат қилади.