Бугунги кунда ҳоким ёрдамчилари ва ҳудудларни ижтимоий-иқтисодий ривожлантириш масалалари бўйича сектор раҳбарлари биргаликда ҳар бир маҳаллани ижтимоий-иқтисодий ривожлантириш бўйича белгиланган чора-тадбирлар режаси асосида қатор ишларни амалга оширмоқда.

Жумладан, Тошкент шаҳри 4-сектор раҳбари, шаҳар Давлат солиқ бошқармаси бошлиғи Юнусжон Насимжонов раҳбарлигидаги ишчи гуруҳ аҳоли бандлигини таъминлаш, тадбиркорликни ривожлантириш ҳамда камбағалликни қисқартириш, аҳолининг қийналган қатламига ёрдам бериш йўлида муайян ишларни амалга оширяпти. Пойтахтимизнинг барча туманлари бўйлаб Ҳоким ёрдамчилари ва Ёшлар етакчилари фаолиятини таҳлилий ўрганиш ҳамда улар билан биргаликда камбағалликни қисқартиришдек саховатли ишларга бош бўлаяпти.

Масалан, яқинда Юнусобод туманида истиқомат қилувчи «Темир дафтар», «Ёшлар дафтари» ва «Аёллар дафтари» га киритилган фуқаролардан яшаш жойига чиққан ҳолда хабар олинди. Мазкур туманнинг «Посира» маҳалласи ҳоким ёрдамчиси ва Ёшлар етакчиси билан биргаликда 5-А ётоқхона 7-хонада истиқомат қилувчи Наргиза Юсуповага умумий фойдаланиш учун иситгич печи топширилди. Ушбу ётоқхонанинг 6-хонасида истиқомат қилувчи Дилноза Одиловага ҳам иситгич печи тақдим этилди.

Шунингдек, туманнинг "Янгитарнов» МФЙда истиқомат қилувчи оилавий тадбиркорлик қилиш истагида бўлган Шаҳло Тиллаевага тикув машинаси ва Оверло ускунаси тақдим этилди. Эндиликда ушбу фуқаро ўзини ўзи банд қилган ҳолда оилавий тадбиркорликни йўлга қўйиб, биринчи навбатда ўз оилавий шароитини яхшилашга эришса, иккинчидан, маҳалладошларини ҳам иш билан таъминлашга кўмакчи бўлишини алоҳида таъкидлади.

Юнусобод туманининг «Буюк Турон» маҳалласида истиқомат қилувчи «Аёллар дафтари»га киритилган фуқаролар Гулнора Эгамова ва Наргиза Файзуллаевага уй шароитида қўшимча даромад манбаига эга бўлиш мақсадида пишириқ тайёрлаш учун электропечь ҳадя этилди. Фуқаролар кўрсатилган ёрдамдан манфаатдор бўлиб, сектор раҳбарларига ўз миннатдорчилигини изҳор қилди.

Кўрсатилаётган ёрдамлардан кўзланган мақсад ҳам оилаларнинг ижтимоий аҳволини яхшилаш, шу орқали бутун маҳалла аҳлига кўмак кўрсатишдан иборат.