Барча ҳудудларда бўлгани каби Хоразмда ҳам ижтимоий ҳимояга муҳтож оилалар, якка ёлғиз, ногирон, даромади йўқ ишсиз, "Темир дафтар"га кирган фуқароларни қўллаб-қувватлаш ва уларга ёрдам кўрсатиш борасида кенг кўламли ишлар амалга оширилмоқда.

Биргина жорий йил олти ойи мобайнида ана шу тоифадаги 21 минг 198 нафар фуқарога "Маҳалла" хайрия жамоат фонди Хоразм вилоят бошқаруви, унинг туман ва шаҳар бўлинмалари ҳузурида ташкил этилган "Саховат ва кўмак" жамғармаси ҳисобидан 7 миллиард 159 миллион сўмлик ёрдамлар кўрсатилди.

– "Маҳалла" фонд ва унинг вилоятдаги қуйи тузилмалари таркибидаги жамғармага Президентимизнинг 2020 йил 24 ноябрдаги "Суд ҳужжатлари ва бошқа органлар ҳужжатларини ижро этиш тизимини янада такомиллаштириш чора-тадбирлари тўғрисида"ги фармонининг тегишли бандига асосан инсонларни қўллаб-қувватлаш, уларга ҳар томонлама кўмак кўрсатиш мақсадида 4 миллиард 690 миллион сўм, маҳаллий бюджет даромад режасидан орттирилган 281 миллион сўм, "Темир дафтар" рўйхатида турган фуқароларни қўллаб-қувватлаш мақсадида 3 миллиард 337 миллион сўм пул маблағи келиб тушганди, – дейди "Маҳалла" хайрия жамоат фонди Хоразм вилоят бўлими бошқарув раиси Олтибой Раджабов. – Ушбу пул маблағлари халқ депутатлари вилоят, туман ва шаҳар Кенгашлари қарорлари, улар берган рўйхатлар асосида ўз эгаларига етказилди.

Бир сўз билан айтганда, Хоразмда "Маҳалла" фонд, унинг қуйи тузилмалари қошида пандемия даврида Президентимиз ташаббуси билан очилган "Саховат ва кўмак" жамғармаси орқали ижтимоий ҳимояга муҳтож аҳоли қатламини қўллаб-қувватлаш борасидаги ишлар изчил давом этмоқда.