Эҳтиёжманд оилаларни моддий-маънавий қўллаб-қувватлаш, ўзгалар қаровига муҳтож кишиларни йўқлаш “Инсон қадри учун” эзгу тамойили асосида амалга оширилмоқда.

Ўзбекистон “Маҳалла” хайрия жамоат фонди Республика бошқаруви раиси Дилшод Усмонов Наманган вилоятида бўлиб, бир нечта хонадонларга кириб, савобли ишларга бош-қош бўлди. Йўқлов баҳона оилаларнинг муаммолари яқиндан ўрганилиб, уларни ҳал этиш бўйича масъулларга кўрсатмалар берилди.

“Маҳалла” фонди томонидан узоқ вақтдан бери даволанаётган беморлар, қарамоғида ногиронлиги бўлган ва эҳтиёжманд оилаларга инсонпарварлик ёрдамлари кўрсатишга эътибор қаратилмоқда.

Наманган туманининг Нуртепа маҳалласида истиқомат қилувчи Хайрулло Рустамов 2014 йилда инсульт бўлиб, ётиб қолган. Тўрт нафар фарзанд ўстираётган оила соҳибининг яшаш шароити билан танишилгач, ушбу ҳовлидаги бир неча йиллик ташвиш, яъни ёғингарчилик бўлганда оқова сувни чиқариб юбориш учун ариқлар ўрнатиш бўйича масъулларга топшириқлар юклатилди. Шу маҳаллада яшовчи иккинчи гуруҳ ногирони Абдували Мирзахоловнинг қарамоғида икки ногирон фарзанди бор. Қолаверса, бу оила Қирғизистон Республикасида туғилган етим болани фарзандликка олган. Бу оиланинг моддий шароитини яхшилаш, даромад манбаига эга бўлиши учун тикувчилик дастгоҳи ҳамда бир марталик моддий ёрдам бериладиган бўлди.

Шунингдек, Қоратепа маҳалласи, “Нуробод” кўчасида яшовчи 61 ёшли 2-гуруҳ ногиронлиги бор Анваржон Низомовнинг хонадонига ҳам борилиб, совғалар ва озиқ-овқат маҳсулотлари берилди.

Наманган вилоятида “Инсон қадрини улуғлаш ва фаол маҳалла йили” Давлат дастури ижроси доирасидаги хайрли тадбирлар давом этмоқда.