Ўзбекистон Республикаси Президенти Администрацияси, Судьялар олий кенгаши, Олий суд, Бош прокуратура ҳамда Ички ишлар вазирлигининг масъул мутасаддилари иштирокида Андижон вилоятида суд-ҳуқуқ масалалари бўйича ташкил этилган оммавий қабулларда кўплаб фуқароларнинг муаммолари ижобий ечим топди.

Ўзбекистон Республикаси Ички ишлар вазири ўринбосари, полковник Яҳёжон Абдулҳаков томонидан Андижон, Асака ва Олтинкўл туманларида ўтказилган сайёр қабуллар давомида 100 нафарга яқин фуқаронинг мурожаатлари эшитилди. Сайёр қабулларда фуқаролардан суриштирув ва тергов, ID карта олиш, жазони ўташдан муддатидан илгари озод қилиш, суюлтирилган газ баллони, моддий ёрдам олиш, иссиқхона қуриш учун субсидия ажратилиши, ишга жойлашиш, тўлов контрактини тўлаб бериш, Ўзбекистон Республикаси фуқаролиги тўғрисида паспорт олиш ва шу каби бошқа масалаларга оид мурожаатларнинг 59 таси жойида ижобий ҳал этилди. Қўшимча ўрганиш талаб этиладиган 28 та мурожаат ўрганиш ва кўриб чиқиш учун мутасадди идоралар масъулларига тақдим этилиб, ижроси назоратга олинди. 

Шунингдек, сайёр қабуллар давомида бир гуруҳ шахсларга Ўзбекистон Республикаси фуқаролиги паспорти, кўплаб ёшларга эса ID карталари тантанали равишда топширилди. Сайёр қабулларда фуқароларнинг ҳуқуқий билим ва саводхонлигини ошириш юзасидан суҳбатлар ўтказилди.