Навоий вилояти Зарафшон шаҳрида фуқароларнинг суд-ҳуқуқ соҳасидаги мурожаатларига самарали ечим топиш учун янада қулай шароит яратиш мақсадида оммавий қабул ўтказилди.

Унда Ўзбекистон Республикаси Президенти Администрацияси, Олий суд, Прокуратура, Ички ишлар вазирлигининг масъул ходимлари Зарафшон шаҳри, Учқудуқ ва Томди туманларида истиқомат қилувчи фуқароларнинг мурожаат ва таклифларини ўрганди. 

Қабулда Олий суд раисининг ўринбосари Бахтиёр Исаков томонидан 67 нафар фуқаро қабул қилинди. Мурожаатларнинг 34 таси бўйича ҳуқуқий тушунтиришлар берилди, 29 та мурожаат жойида ижобий ҳал этилиб, 4 та мурожаат бўйича аризалар Олий суд томонидан кассация тартибида ҳал қилиш учун қабул қилинди, ушбу мурожаатларнинг барчаси қаноатлантирилиб, тегишли судлов ҳайъатига кўриб чиқиш учун ўтказилди. 

– Жиноят ишлари бўйича Зарафшон шаҳар ва Томди туман судлари томонидан 3 нафар шахс жазони ўташдан муддатидан олдин озод қилинган бўлса, 25 кишига нисбатан тайинланган озодликдан маҳрум қилиш ва озодликни чеклаш жазолари енгилроғи билан алмаштирилди ҳамда Томди туман суди томонидан 1 та жиноят иши тарафларнинг ярашувига асосан тугатилди, – дейди Навоий вилояти суди жамоатчилик ва ОАВлар билан алоқалар бўйича бош консультанти Азиза Рўзиева. – Шунингдек, фуқаролик ишлари бўйича Зарафшон туманлараро суди томонидан 8 нафар, фуқаролик ишлари бўйича Учқудуқ туман суди томонидан 2 нафар шахсга нисбатан алимент ундириш юзасидан суд буйруғи чиқарилди ва 14 нафар фуқаронинг қарийб 92 миллион сўмлик иш ҳақини ундириш юзасидан ижро ҳужжатлари ижрога қаратилди.  

Оммавий қабулда фуқаролик ишлари бўйича судлар томонидан 4 нафар шахснинг юридик аҳамиятга эга бўлган фактларни белгилаш, 1 нафар фуқаронинг уйга киритиш ҳақидаги даъво аризаси қаноатлантирилди. Шу куни ажрашиш ёқасига келиб қолган оилалар билан суҳбат ўтказилиб, 2 нафар вояга етмаган фарзанди бор 3 та оила яраштирилди. Иқтисодий судлар томонидан эса 2 та иш суд мажлисларида кўрилиб, тадбиркорлар фойдасига жами 4 миллиард 913 миллион сўмлик даъво талаблари қаноатлантирилди ва Республика бюджетига суд қарорларига асосан қарийб 84 миллион сўм давлат божи ундирилиши белгиланган.  

Суд-ҳуқуқ масалалари бўйича Навбаҳор туманининг “Кескантерак” маҳалласида Навбаҳор ва Нурота, Хатирчи туманлари, Кармана туманидаги “Офтобжон” болалар оромгоҳида Навоий ва Ғозғон шаҳарлари ҳамда Кармана тумани, Қизилтепа тумани “Ванғози” маҳалласида Қизилтепа ва Конимех туманларида истиқомат қилувчи фуқаролар учун оммавий қабул бўлиб ўтади.