Сурхондарё вилояти давлат солиқ бошқармаси бошлиғи, 4-сектор раҳбари Эркин Нарманов Қумқўрғон туманидаги Ҳунармандлар маҳалласида сайёр қабул ўтказди.

Унда 4-секторга қарашли Ҳунармандлар, Мунчоқтепа, Чаёнтепа, Жарқишлоқ ҳамда Тайфанг маҳаллаларида яшайдиган фуқаролар иштирок этиб, дуч келаётган муаммоларини ўртага ташлади.  

Очиқ мулоқотда боғча қуриш, ичимлик сув таъминоти, янги электр устунлари ўрнатиш, бандлик масаласини ҳал этиш, моддий ёрдам кўрсатиш каби 42 та муҳим масаланинг ечимини топиш ўртага ташланди. 

Қабул чоғида 4-сектор раҳбари Эркин Нарманов ва туман ҳокими Раҳматулло Гаппаров келиб тушган мурожаатларнинг 11 тасини жойида ҳал этди. Ечими вақт талаб этадиган мурожаатларни ҳал этиш учун тегишли муддат белгиланиб, ижроси қатьий назоратга олинди.  

–Ичимлик сув таъминоти муаммо бўлиб келаётган эди, – дейди Кўчарсой қишлоғида яшайдиган Хуррам Худойқулов.– Етарли маблағ ва эътибор билан бу масаланинг ечимини топса бўлади. Қўшни қишлоқдан 400 метр сув қувури ётқизиб, тоза ичимлик сувини олиб келиш мумкин. Ҳашар йўли билан қувур ётқизиш учун халқимизда етарли маблағ йўқ. Бугун шу муаммони айтган эдик, масала ҳал этиладиган, яқин вақтда бизнинг қишлоққа ҳам тоза ичимлик сув келадиган бўлди. Чекка ҳудудлар аҳолисидан хол-аҳвол сўраётган давлатимиздан беҳад миннадормиз. 

Сайёр қабулларда вилоятнинг энг чекка ҳудудлари аҳолиси билан юзма-юз ўтказилаётган бундай очиқ мулоқотлар жойлардаги мавжуд муаммо ва камчиликларни бартараф этиб, аҳолининг турмуш шароитини янада яхшилаш ҳамда инсон қадрини улуғлашга хизмат қилаётгани билан аҳамиятли бўлмоқда.