Бухоро вилояти Ромитан тумани Қаҳрамон маҳалла фуқаролар йиғини Истиқлол қишлоғида яшовчи 1-гуруҳ ногирони Тошпўлот Ўриновнинг мурожаати Ўзбекистон Республикаси Президентининг Ромитан туманидаги Халқ қабулхонаси томонидан ижобий ҳал этилди.

Мурожаат туманнинг Халқ қабулхонаси мудири бошчилигида туман ҳокими, 2-сектор раҳбари ва бошқа тегишли мутасаддилар томонидан жойида бориб ўрганилди.

– Ўрганиш натижаларига кўра, фуқаро Тошпўлот Ўриновнинг хонадонига амалий ёрдам кўрсатиш чора-тадбирлари белгиланди, – дейди Ўзбекистон Республикаси Президентининг Ромитан туманидаги Халқ қабулхонаси мудири Ғ.Муясаров. – Ҳамкорликдаги саъй-ҳаракатлар туфайли саховатпеша ҳомийлар ёрдамида 1-гуруҳ ногирони фуқаро Тошпўлот Ўриновнинг хонадонида 20 миллион сўмдан ортиқ маблағ эвазига енгил конструкцияли замонавий ҳаммом, ҳожатхона қурилди. Хонадонга янги эшиклар ўрнатилиб, мурожаатидаги масалалар ўз ечимини топди. Турмуш ўртоғи М.Каримова эса ҳудудда яқинда иш бошлаган WBM “ROMITEX” МЧЖ корхонасига ишга жойлаштирилди.

Жорий йилнинг ўтган 11 ойида туман Халқ қабулхонасига ҳудудда яшовчи фуқаролардан 1 минг 638 та мурожаат келиб тушган. Шулардан 1 минг 227 таси қаноатлантирилган.  900 тадан ортиғи яъни 74 фоизи ижобий ҳал этилган. Туман Халқ қабулхонаси, секторлар ҳамда тумандаги давлат идора ва ташкилотларнинг ҳамкорликдаги саъй-ҳаракати туфайли ушбу ҳудудда жисмоний ва юридик шахсларнинг мурожаатлари билан ишлашнинг натижадорлиги сезиларли даражада ортмоқда.