Самарқанд вилоят суди раиси О.Ҳайитовнинг бу галги сайёр қабули Самарқанд шаҳар “Боғисарой” маҳалла фуқаролар йиғинида ўтказилди.

Шаҳардаги Президент Халқ қабулхонаси билан ҳамкорликда ташкил этилган қабулда 50 нафарга яқин шахснинг мурожаати тингланди. Мурожаатларнинг асосий қисмини алимент, никоҳ, уй-жой, тадбиркорлик фаолияти билан боғлиқ масалалар ташкил этди.

Ҳар бир мурожаат алоҳида ўрганиб чиқилди ва қонун доирасида ижобий ҳал қилинди. Шунингдек, қабулда содир қилган жиноий қилмиши учун жазо ўтаётган маҳкумлар пушаймонлиги, қатъий тузалиш йўлига ўтганлиги, жазодан тегишли хулоса чиқарганлигини инобатга олиб, жазони енгиллаштиришни, озод этишни сўраб мурожаат қилди.

Шу ернинг ўзида жиноят ишлари бўйича Самарқанд шаҳар судининг сайёр суд мажлиси ташкил этилди. Ҳар бир ҳолат алоҳида-алоҳида кўриб чиқилди. Жиноий қилмиши учун жазо ўтаётган 10 нафар шахс тегишли хулоса чиқарганлиги инобатга олиниб, Ўзбекистон Республикаси Жиноят кодексининг 74-моддасига асосан қамоқдан озод қилинди. Бундан ташқари, 13 нафар шахс Жиноят кодексининг 73-моддасига кўра, 26 нафар шахс Маъмурий жавобгарлик тўғрисидаги кодекснинг 271-моддаси 11-бандига асосан жавобгарликдан озод қилинди. Бир нафар шахс ярашганлиги муносабати билан жиноят иши ҳаракатдан тугатилди.