Пахтачи туманидаги сектор раҳбарлари тумандаги ота-онасиз, чин етим болалардан ҳол сўраб, уларга қишки мавсум учун кийим-бош туҳфа қилди.

– Ота-она меҳридан маҳрум бўлган болаларни қўллаб-қувватлаш, уларни жамиятнинг фаол аъзолари сифатида тарбиялаш барчамиздан жиддий эътибор ва амалий ҳаракатларни талаб қилади, – дейди туман ҳокимлиги болаларни ҳимоя қилиш шўъбаси мудири Д.Номозов. – Шундан келиб чиқиб, уларни замонавий касб-ҳунарга ўқитиш, билим олишига шарт-шароит яратиш борасида туманимизда ҳам амалий ишлар олиб борилмоқда. Айни пайтда куз-қиш мавсуми олдидан сектор раҳбарлари ташаббуси билан 35 нафар меҳрга муҳтож болалардан ҳол сўралиб, уларга меҳр-мурувват кўрсатилди. Бир пиёла чой устидан дилдан суҳбат қурилди.

Туман ҳокими М.Ҳамдамов ота-она қарамоғисиз қолган болаларни ижтимоий ҳимоя қилиш энг биринчи галдаги вазифа эканлигини таъкидлаб, уларнинг бошқа тенгдошларидан кам бўлмай яшаши, таълим-тарбия олиши учун давлат томонидан барча шарт-шароит яратиб берилгани, улар раҳбарларнинг ҳам доимий эътиборида бўлишини қайд этди.

Болаларнинг ҳар бириги кийим-бош берилиши билан бирга уларнинг эҳтиёжидан келиб чиқиб, ҳомийлик ёрдамлари ҳам кўрсатилди.

– Олий ўқув юртига ўқишга кириш учун қўшимча дарсларда иштирок этишим керак эди, – дейди Г.Қурбонова. – Туман ҳокимлиги бу масалада ҳам менга ёрдам бериб, бунинг учун тўловларни тўлаб беришни ўз зиммасига олди.