Гулистон шаҳридаги Ҳалима Худойбердиева номидаги ижод мактабида “Ёшларни қўллаб-қувватлаш ва аҳоли саломатлигини мустаҳкамлаш йили” давлат дастури ва Президентмиз раҳбарлигида ўтказилган Ўзбекистон Республикасида ёшларга оид давлат сиёсатини тубдан ислоҳ қилиш ва янги босқичга олиб чиқиш мақсадида ўтказилган видеоселекторда юклатилган топшириқлар ижросини таъминлаш мақсадида “Раҳбар ва ёшлар” учрашуви бўлиб ўтди.

Давлат дастури ва Юртбошимизнинг видеоселектор йиғилишидаги топшириқлари ижросини таъминлашга қаратилган тадбирда Ўзбекистон Республикаси Мудофаа вазирининг ўринбосари полковник Ҳамдам Қаршиев, Сирдарё вилояти ҳокимининг биринчи ўринбосари Анвар Каримов, республика Ўрмон хўжалиги давлат қўмитаси раис ўринбосари Шерзод Усмонов, “Ўзагро экспорт банк” акциядорлик тижорат банки бошқарув раиси Наврўзжон Алимов, мутасадди ташкилот, муассаса ва идораларнинг раҳбарлари, фаол ёшлар, оммавий ахборот восталарининг вакиллари иштирок этди.  

Сирдарё вилоятида ҳам “Раҳбар ва ёшлар” учрашувида йигит-қизларнинг  олдида  турган  муаммо ва камчиликлар, уларга ечим топиш, ёшлар томонидан кўтарилган масалаларни ҳал этиш бўйича тизимли ишлар амалга  оширилмоқда.

Учрашувда асосий эътибор ёшлар бандлигини таъминлаш, тадбиркорлик фаолиятларини қўллаб-қувватлаш, муаммоларни ҳал этишга эътибор қаратилди.

Тадбирда кўплаб ёшлар учрашувга келган раҳбарларга очиқ-ойдин ўзларини қийнаётган муаммолар бўйича мурожаат қилди. Ёшларнинг тадбиркорлик фаолиятини ривожлантириш, иш билан таъминлаш, қишлоқларда йиллар давомида тўпланиб қолган муаммоларни ҳал қилиш бўйича қилган мурожаат, таклиф ва  талаблари шу ернинг ўзида  мутасадди раҳбарлар иштирокида ўрганилиб, масалаларга ижобий ечим топилди.

Ишсиз ёшларни касб-ҳунарга ўргатиш мақсадида ҳар бир туман ва шаҳарда ташкил этилган қисқа муддатли ўқув курсларига йўналтириш бўйича ҳам аниқ вазифалар белгилаб олинди.  

– Бугунги учрашувга келиб хато қилмаганимни тўла англаб етдим, – дейди Ширин шаҳрида яшовчи Шоҳрух Анорқулов. – Тадбиркорлик фаолиятини йўлга қўйишим учун кредит ололмай қийналаётгандим. Бу масалада менга раҳбарлар, хусусан, вилоят ҳокимининг биринчи ўринбосари Анвар Каримов ёрдам қўлини чўзди. Ҳоким ўринбосарининг топшириғи билан “Халқ банки” вилоят филиали менга зарур имтиёзли кредит маблағи ажратадиган бўлди. Кредит маблағи ҳал бўлиши билан тадбиркорлик фаолиятимни бошлайман.  

Тадбирда ёшлар мурожаатларининг асосий қисми шу жойнинг ўзида ижобий ечим топди.

Ижросини таъминлаш учун вақт ва маблағ талаб қилинадиган масалалар юзасидан мутасаддиларга вазифалар юклатилиб, ижроси назоратга олинди.