Ўзбекистон Республикаси Олий Мажлиси Сенати Фан, таълим ва соғлиқни сақлаш масалалари қўмитаси томонидан етим болалар ва ота-она ёки бошқа қонуний вакилларининг қарамоғидан маҳрум бўлган болаларни ижтимоий қўллаб-қувватлашнинг қонуний асосларини янада мустаҳкамлаш масаласини комплекс ўрганиш бўйича Ишчи гуруҳ йиғилиши ўтказилди.

Давлатимиз раҳбарининг парламентга йўллаган Мурожаатномасида жорий йил эҳтиёжманд оилалар фарзандлари, шу жумладан, чин етим, ногиронлиги бўлган ва даволанишга муҳтож болаларга алоҳида меҳр-мурувват кўрсатиш бўйича янги тизим жорий этилиши, бунда жорий йилда биринчи марта 900 нафар чин етим ёшни уй-жой билан таъминлаш учун 50 миллиард сўм маблағ ажратилаётгани таъкидланганди.

Ўтган икки йил давомида етим болалар ва ота-онасининг ёки бошқа қонуний вакилларининг қарамоғидан маҳрум бўлган болаларни ижтимоий қўллаб-қувватлаш бўйича бир қатор норматив-ҳуқуқий ҳужжатлар қабул қилинган. Бироқ етим болалар ва ота-она қарамоғидан маҳрум бўлган болаларга таълим бериш, ижтимоий ҳимояга бўлган ҳуқуқларини муҳофаза қилиш, ҳуқуқ ва эркинликларини амалда рўёбга чиқариш борасидаги муносабатлар яхлит норматив-ҳуқуқий ҳужжатга бирлаштирилмаган. "Меҳрибонлик уйи"ни битирган ёшларнинг жамиятга ижтимоий мослашуви, таълим олиши ва бандлигини таъминлаш борасида яхлит тизим шакллантирилмаган.

Бундан ташқари, йиғилишда етим болалар ва ота-она қарамоғидан маҳрум бўлган болаларнинг ҳуқуқ ва эркинликларини кафолатлаш, уларни ижтимоий ҳимоя қилиш соҳасидаги қонунчиликни такомиллаштириш мақсадида ушбу соҳани комплекс ўрганишни ташкил этиш бўйича олиб бориладиган чора-тадбирлар муҳокама қилинди.

Шунингдек, жорий йил 5 майга қадар етим болалар ва ота-она ёки бошқа қонуний вакилларининг қарамоғидан маҳрум бўлган болаларни ижтимоий қўллаб-қувватлаш соҳасидаги умумлаштирилган таклифлар ишлаб чиқилиши келишиб олинди.