Давлатимиз раҳбарининг жорий йил 27 январь куни “Ёшлар учун иш ўрни яратиш ва уларнинг бўш вақтини мазмунли ташкил этиш” масалаларига бағишлаб ўтказган видеоселектор йиғилишида берган топшириқларига асосан, Навоий вилоятида вилоят ҳокимлиги, Ёшлар ишлари агентлиги вилоят бошқармаси, Бандлик бошқармаси, тижорат банклари билан ҳамкорликда амалий ишлар бошланган.

Хусусан, Конимех туманининг олис чўл ҳудудларидан бири бўлган “Саржал” ОФЙдаги ишсиз 18 нафар йигит-қиз бандлигини таъминлаш мақсадида 15 бошдан майда шохли мол берилди. Имтиёзли кредит асосида берилаётган бу имконият ёшларнинг чорвачилик соҳасидаги илк қадамлари бўлди.  

– Мен “Саржал” ОФЙ қарашли “Териқудуқ” овулида яшайман, – дейди Ержан Асанов. – Мен ҳам бугун тенгдошларим қатори наслли қўй олдим. Ниятим, ўз чорвачилик фаолиятимни кенгайтириб, юртим равнақига беминнат ҳисса қўшишдир.

Шунингдек, туман ҳокимлиги томонидан конимехлик 16 нафар ёшни иш билан банд қилиш, аҳоли дастурхони тўкинлигини таъминлаш мақсадида 50 сотихдан 1 йил муддатга фойдаланиш учун ер майдонлари ажратилди.

Ёшларга жорий йилда амалга оширилиши режалаштирилган бир қатор лойиҳалар ва ташаббуслар, ердан самарали фойдаланиш тўғрисида маълумотлар берилди.