Жиззах вилояти марказида тадбиркорлар ҳуқуқларини ҳимоя қилиш масалаларига бағишланган семинар бўлиб ўтди.

Унда вилоят ҳокимининг биринчи ўринбосари Зафар Азимов, Бизнес-омбудсман девони ходимлари, тадбиркорлар ҳамда назорат қилувчи органлар ва оммавий ахборот воситалари вакиллари иштирок этди.  

Семинарда Ўзбекистон Республикаси Президентининг 2024 йил 14 ноябрдаги “Тадбиркорлар ҳуқуқлари ва қонуний манфаатларини ишончли ҳимоя қилиш чора-тадбирлари тўғрисида”ги фармони ижроси юзасидан фикр алмашилди.

Шунингдек, тадбиркорлик фаолиятига оид амалдаги қонунчилик ҳужжатлари ва уларга киритилган сўнгги ўзгартиришлар ҳақида батафсил маълумотлар берилди.  

Тадбирда 23 га яқин назорат қилувчи органлардан 300 нафарга яқин ходим қатнашди. Уларга тадбиркорлик субектларида текширувларни ўтказиш тартиби ҳамда текширувчиларнинг ҳуқуқ ва мажбуриятлари бўйича атрофлича тушунчалар берилди.

Семинар сўнгида иштирокчилар ўзларини қизиқтирган саволларга батафсил жавоблар олди.