Халқимизга хос эзгулик, бағрикенглик, инсонпарварлик, меҳр-оқибат ва кечиримли бўлиш каби олижаноб фазилатларнинг ёрқин ифодаси сифатида “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармон жамоатчилик томонидан кўтаринки руҳда қарши олинди.

Фармонга мувофиқ, Ўзбекистон Республикаси Конституциясининг 109-моддаси 23-бандига асосан жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига ўтган 488 нафар шахс афв этилди. Улар қаторида Бухоро вилоятида истиқомат қилувчи 18 нафар шахслар ҳам бор.

Бухоро вилояти прокурори У.Ҳамидов ҳамда Ички ишлар бошқармаси бошлиғи И.Турсунов бошчилигидаги масъуллар афв этилган 18 нафар бухоролик фуқароларнинг муаммоларини ўрганиб, уларнинг мурожаатлари бўйича манзилли чора тадбирларни белгилади.

Шунингдек, афв этилиб, оиласи ва яқинлари бағрига қайтган ушбу фуқароларни ижтимоий ҳаётга мослаштириш, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун кўмак бериш борасида “маҳалла еттилиги”, тегишли корхона ва ташкилотлар вакилларига топшириқ ва кўрсатмалар берилди.