Ҳудудларда аҳоли томонидан келиб тушаётган ҳар қандай мурожаатлар депутатлар томонидан ўрганиб, ижроси назоратга олинмоқда.

Қорақалпоғистон Республикаси Жўқорғи Кенгеси депутати Саят Гичгелдиевага ўзи сайланган ҳудуд Тўрткўл туманидаги “Калтаминор” овул фуқаролар йиғини аҳолисидан мурожаат келиб тушди. Ушбу мурожаат ўрганиб чиқилганда, аҳоли томонидан фойдаланиб келаётган ТП-411 трансформатори эскирганлиги сабабли охирги бир ҳафтада электр таъминотида узилишлар бўлаётгани аниқланди.  

Ҳолат юзасидан депутат Тўрткўл туман электр тармоқлари корхонаси мутасаддилари билан гаплашди ва уша куннинг ўзида муаммони бартараф қилиш учун ишчилар бригадаси юборилди. Натижада яроқсиз трансформатор янгисига алмаштирилди ва корхона ишчиларининг саъй-ҳаракатлари билан электр таъминоти қайта тикланди.  

Аҳолини қийнаб келаётган муаммолар юзасидан “Пахтачи”, “Отаюрт” овул, “Баҳор” маҳалла фуқаролар йиғинлари фаоллари билан учрашув ташкил этилди. Унда ичимлик суви, электр энергия таъминоти, табиий газ босимининг пастлиги, “Отаюрт” овул фуқаролар йиғини аҳолиси фарзандлари таълим олаётган 9-сонли умумтаълим мактабига қатнашда “Калтаминор” каналига кўприк қўриш  юзасидан таклиф билдирилди.  

Ичимлик суви таъминоти муаммоси бўйича “Qoraqalpoq suv ta’minoti” акциядорлик жамияти туман филиали раҳбари билан гаплашилди ва шу куннинг ўзида қувурларни алмаштириш учун қазиш ишлари бошлаб юборилди. Шунингдек, табиий газ босими пастлиги бўйича аҳоли ўртасида тушунтириш ишлари олиб борилаётгани,  тежамкор горелкаларни ўрнатиш  бўйича ҳар куни секторлар кесимида рейдлар ўтқазилиб турилгани қайд этилди.