Рақобат муҳитини ривожлантириш ва маҳаллий маҳсулотларнинг ички ва ташқи бозорлардаги рақобатбардошлигини таъминлаш мақсадида муҳим тадбирлар уюштирилмоқда.

Яқинда Жиззах шаҳри ва Мирзачўл туманида ҳуқуқни муҳофаза қилувчи ва назорат органлари раҳбарларининг бўлиб ўтган оммавий сайёр қабули ҳам шулар жумласидандир.

Жиззах вилоят солиқ бошқармаси бошлиғи Б.Ташпўлатов ҳам шу ҳудудлар тадбиркорлари билан юзма-юз учрашиб, очиқ мулоқот ўтказди.

Учрашувда солиқ тизимидаги муаммоларни ҳал этиш, барқарорлик рейтингининг мазмун-моҳиятини тушунтириш ва ички бозорда тенг рақобат муҳитини яратиш масалалари атрофлича муҳокама қилинди.  

Шунингдек, тадбиркорларга ташқи бозорларда имкониятларини кенгайтириш борасида яратилиб берилган шароитлар ҳақида ҳам батафсил маълумотлар берилди. Вилоят солиқ бошқармаси бошлиғи учрашувда ҳозир бўлган тадбиркорларнинг ҳар бири билан юзма-юз мулоқотда бўлиб, тадбиркорни қийнаётган муаммолар, таклиф ва мулоҳазаларни диққат билан тинглаб, уларнинг ҳар бирини алоҳида-алоҳида қайд этиб борди.

– Ўзбекистоннинг иқтисодий кўрсаткичлари ижобий ўсишда давом этиб, жорий йилнинг ўтган 7 ойлик экспорт ҳажми 13 фоизга ошди ва у 10 миллиард АҚШ долларидан ортди, – дейди Жиззах вилоят солиқ бошқармаси бошлиғи Бегзод Ташпўлатов. – Бу жараёнда аввалги даврларда экспорт қилмаган 1610 та янги корхона ташқи бозорларга чиқишга муваффақ бўлди. Бу эса мамлакатимизнинг иқтисодий барқарорлигини ошириш ва тадбиркорлик фаолияти ривожланишида муҳим аҳамият касб этади.

Ушбу учрашув тадбиркорлар учун янги имкониятлар эшигини очишда, уларнинг фикр-мулоҳазалари ва таклифлари солиқ тизимининг такомиллаштирилиши, рақобатбардош муҳитнинг яратилишида  муҳим аҳамиятга эгадир.