Наманган вилояти ҳокими Шавкат Абдураззоқов Янгиқўрғон туманида турли масалалар бўйича вилоят ҳокими номига мурожаат йўллаган фуқароларни қабул қилди.

Туманнинг Маданият марказида қарийб 7 соат давом этган жараёнда 200 га яқин юртдошимиз вилоят раҳбари билан юзма-юз учрашиб, ўз муаммоси ечими бўйича кўмак сўради. Вилоят ҳокими уларнинг ҳар бирини қийнаётган масалани тинглаб, ҳал этиш юзасидан тегишли чоралар белгилади.

– Буйрак етишмовчилиги бўйича операциядан сўнг дори-дармон олишга қийналаётган эдим, - дейди Уйчи туманилик Қобилжон Алиев. – Ушбу масалада кўмак сўраб вилоят ҳокимининг қабулига келдим. Шу ернинг ўзида соғлиқни сақлаш бошқармаси бошлиғига топшириқ берилиб, мурожаатим ижобий ҳал этилди. Бундан ташқари, ижарада яшаётганим учун турар-жой масаласида ҳам амалий ёрдам кўрсатиладиган бўлди.

Шунингдек, қабулда фуқароларнинг уй-жой, кадастр, қурилиш, кредит, моддий ёрдам олиш, ёшлар ишлари ва ҳуқуқий мавзулардаги мурожаатлари ўрганилиб, ечими бўйича мутасадди идоралар раҳбарларига топшириқ ҳамда кўрсатмалар берилди.