Мамлакатимизда сўнгги йилларда қийин шароитда яшаётган оилаларни қўллаб-қувватлаш, ана шу оилалар аъзоларининг бандлигини таъминлаш, доимий даромад манбаини шакллантириш, камбағалликдан чиқариш борасида кенг кўламли ишлар олиб борилмоқда.

Давлатимиз раҳбари ташаббуси билан амалга оширилаётган “Камбағалликдан – фаровонлик сари” дастури ижроси доирасида Андижон вилояти соғлиқни сақлаш бошқармаси томонидан камбағал оилаларнинг ижтимоий ҳолатини яхшилаш, доимий даромад манбаига эга бўлишларига кўмаклашиш мақсадида вилоятнинг бир қатор ҳудудларида ижтимоий ҳимояга муҳтож оилаларнинг яшаш шароитлари, муаммо ва таклифлари ўрганиб борилмоқда, уларга амалий ёрдамлар кўрсатилмоқда. 

Жумладан, вилоят соғлиқни сақлаш бошқармаси бошлиғи Шоҳрухбек Мамажонов ўзига бириктирилган ҳудуд – Жалақудуқ туманидаги Охунбобоев маҳалласида яшовчи аҳоли хонадонларида бўлиб, фуқаролар билан мулоқотда бўлди. 

“Хонадонбай” олиб борилган ўрганиш ва мулоқотлар давомида оилалар, асосан, хотин-қизларнинг муаммолари тингланди. 

Аввалги ўрганишларда маҳалланинг Маориф кўчасида яшовчи М.Ж. 2013 йилда туғилган фарзандининг саломатлигида муаммо мавжудлигини, жарроҳлик операцияси асосида даволаш лозимлигини билдирган эди. Аёлнинг мурожаатига асосан, унинг фарзандига Андижон шаҳар кўп тармоқли болалар шифохонасида даволаниш учун йўлланма берилди. Кейинроқ эса Россия Федерациясидан ташриф буюрган кардиохирург томонидан болада бепул юрак операцияси амалга оширилди. Ҳозирда унинг саломатлиги яхши, мактабда ўқишини давом эттирмоқда. 

Аҳоли вакиллари билан мулоқотлар давомида бошқарма бошлиғи Шоҳрухбек Мамажонов маҳалладаги ижтимоий ҳимояга муҳтож оилаларнинг 40 нафар фарзандига ҳомийлар томонидан ҳадя этилган кийим-кечакларни топширди. 

Бу каби тадбирлар Қўрғонтепа ва Избоскан туманларида ҳам ташкил этилди.