Бугунги кунда мамлакатимизда ижтимоий ҳимояга муҳтож оилаларнинг яшаш шароити, муаммо ва таклифлари, уларнинг “Камбағалликдан фаровонлик сари” тамойили асосида ижтимоий ҳолатини яхшилаш ҳамда доимий даромад манбаига эга бўлиши учун барча чора-тадбирлар белгиланмоқда.

Навоий вилояти ҳокими Нормат Турсунов Конимех туманида аҳоли хонадонларида бўлиб, фуқароларнинг турли йўналишдаги муаммоларини ўрганди. Уларга ечим топиш баробарида тадбиркорлик билан шуғулланиб, янги иш ўринлари яратаётган ишбилармон оилалар ва уларнинг фаолияти билан яқиндан танишди.

Ўрганишлар давомида Маҳмуд Аширбековнинг турмуш ўртоғига нафақа тайинланиши ҳамда ўзининг ишга жойлашиши масаласида қилган мурожаати ижобий ечим топди.

Вилоят ҳокими оилавий тадбиркорлик билан шуғулланаётган Дилшод Бердиев ва Нодирабегим Абдимуратовалар оиласида ҳам бўлди.  

– “Ҳар бир оила тадбиркор” дастури доирасида имтиёзли кредит олиб, “Дилшодбек Камронбек асл нонлари” оилавий ишлаб чиқариш корхонасини ташкил этдик, – дейди Дилшод Бердиев. – Ҳозирда туман аҳолисига нон ва нон маҳсулотлари, турли ширинликлар етказиб беряпмиз. Корхонада ўзимиздан ташқари яна 7 кишининг бандлиги таъминланган.

Конимех тумани марказида жойлашган истироҳат боғида аҳолига маданий хизмат кўрсатиш, оммавий байрам тадбирларини ўтказиш ҳамда маданий-маърифий масканлар фаолиятини тизимли йўлга қўйиш мақсадида амалий ишлар олиб борилмоқда.

Жумладан, мазкур истироҳат боғида туман ҳокимлиги томонидан суғориш тизимини яхшилаш мақсадида 1,8 км полиэтилен қувурлар тортилди ва 1 дона резервуар қурилди. Аҳоли дам олиши учун 40 дона ўриндиқ, 70 дона тунги ёритиш чироқлари ўрнатилиб, болалар учун ўйингоҳ қурилиб фойдаланишга топширилди. Қолаверса, истироҳат боғида “Ташаббусли бюджет” лойиҳаси доирасида капитал қурилиш ишлари олиб борилиши режалаштирилган.

Шунингдек, аҳоли, жумладан, ёшларнинг маданий дам олиши ва бўш вақтини мазмунли ўтказишини тизимли ташкил этиш мақсадида “Дўстлик” маданият марказида ҳам таъмирлаш ишлари олиб борилмоқда.  

Вилоят раҳбари мазкур объектларда бўлиб, амалга оширилиши лозим бўлган ишлар юзасидан ўз фикр ва тавсияларини берди.