Кейинги йилларда мамлакатимизда олиб борилаётган бунёдкорлик ишлари замирида инсон қадрини улуғлаш, одамларнинг оғирини енгил қилиш, турмуш шароитларини яхшилашдек эзгу ва хайрли ишлар ётади.

Айниқса, чекка-чекка маҳаллаларнинг обод масканларга айланаётганлиги, ҳудудларда табиий газ, электр энергияси, ичимлик сув таъминоти яхшиланиб, йўллар таъмирланаётганлиги юртдошларимизни қувонтирмоқда.

Ана шу каби ибратли ишлар доирасида чекка-чекка маҳаллалар йўлларини таъмирлаш, асфальтлаш борасида эътиборга молик ишлар олиб борилмоқда. Буни Қўрғонтепа туманидаги Зарбулоқ маҳалласида олиб борилаётган ишлар мисолида ҳам кўриш мумкин. 

– Бугунги кунда маҳалламизда 3 минг нафардан зиёд аҳоли истиқомат қилади, – дейди “Зарбулоқ” маҳалла фуқаролар йиғини Хотин-қизлар фаоли Зарнигор Ҳасанова. – Маҳалламиз аҳолиси кўп йиллардан буён ички йўлларимизнинг носозлигидан, яъни ёзда чанг, қишда лой эканлигидан азият чекиб келар эди. Турли идораларга мурожаатлар қилинган, лекин масала ҳал бўлмай келаётган эди. 

Давлатимиз раҳбарининг тегишли қарори билан бугун ана шу муаммо бартараф этилмоқда, йўлларимиз ободонлаштирилиб, асфальтланмоқда. 

Айни кунларда мазкур маҳалланинг Зардўз, Хотира ва Оқтепа кўчалари Қўрғонтепа тумани йўллардан фойдаланиш давлат муассасаси мутахассислари томонидан махсус техникалар ёрдамида текисланиб, 1,5 километр қисми асфальтланмоқда. 

Тумандаги қатор маҳалла кўчалари таъмирланиб, кундан-кунга обод масканга айланаётганлигидан одамлар мамнун. Бу каби хайрли ишлар фуқароларнинг эртанги кунга бўлган ишончини оширмоқда, бугунги кунидан рози бўлиб яшашига хизмат қилмоқда.