Наманганда Бош прокуратура ҳузуридаги Мажбурий ижро бюроси вилоят бошқармаси бошлиғи Бекзод Мирзааҳмедов томонидан бевосита шаҳар, туманларда юридик ва жисмоний шахслар учун қабуллар ўтказиб келинмоқда. Ана шундай сайёр қабулнинг навбатдагиси Поп туманида ўтказилди.

Айнан Бюронинг туман бўлимида бўлиб ўтган қабулда саккиз нафар фуқародан алимент, зарар, банк, мажбурият юклаш билан боғлиқ масалалар юзасидан мурожаатлар қабул қилинди. Мурожаатларни ўрганиш учун вақт талаб қилингани сабабли МИБ вилоят бошқармаси таркибий тармоқлар ва давлат ижрочиларига, масъулларга қисқа муддат ичида ҳал этиш юзасидан кўрсатма берилди.  

Шунингдек, Бюронинг Наманган шаҳри ва туманлар бўлимлари раҳбарлари томонидан ҳам секторлардаги белгиланган 13 та маҳалла фуқаролар йиғинида ҳам сайёр қабул ўтказилиб, уларда аҳоли томонидан кўтарилган масалаларни ўрганилган ҳолда ҳал этиш чоралари кўрилди.  

– Бюронинг вилоят бошқармаси ҳамда унинг шаҳар ва туманлар бўлимлари томонидан фуқаролар томонидан йўлланаётган мурожаатлар билан ишлаш, уларга ечим топиш мақсадида тизимли чора-тадбирлар кўрилмоқда, – дейди МИБ Наманган вилояти бошқармаси катта инспектори Музаффар Маматқулов. – Айнан мурожаатларни жойида ҳал қилиш, такрорий аризаларни таҳлил этиш ҳамда уларга ечим топиш, фуқароларга қулай бўлиш мақсадида ҳафтанинг ҳар шанбасида жойларда сайёр қабуллар ташкил этилмоқда.