Ҳудудларда аҳоли турмуш даражасини ошириш, инфратузилмавий муаммоларни бартараф этиш ҳамда фаол фуқаролик позициясини қўллаб-қувватлаш бугунги кунда O‘zLiDePдан сайланган депутатлар фаолиятининг устувор йўналишларидан биридир.

Олий Мажлис Қонунчилик палатаси депутати Гавҳар Олимова Сирдарё вилоятининг Боёвут ва Ховос туманларида амалий учрашувлар ўтказди.
Учрашувлар чоғида маҳаллий йўллар ҳолати, ичимлик ва оқова сув тизимлари, ер ости сувлари, томорқа фаолияти ҳамда таълим муассасаларига хавфсиз қатнов масалалари ўрганилиб, тегишли чора-тадбирлар белгиланди.

Хусусан, Янгиер шаҳрининг Янгиобод ва Наврўзобод маҳаллаларида аҳоли мурожаатига асосан мавжуд тикқудуқ таъмирланди ва яна бир янги қудуқ қазилиб, фойдаланишга топширилди. Маърифат маҳалласини ичимлик суви билан таъминлаш мақсадида эса Давлатобод маҳалласи ҳудудидан сув тортиб келинди. Айни пайтда Жаҳон банки маблағлари ҳисобидан Янгиер шаҳрини тўлиқ ичимлик суви билан таъминлаш бўйича 11 миллион долларлик лойиҳа амалга оширилмоқда.

Ховос туманидаги Дўстлик маҳалласининг Ал-Бухорий кўчасида болалар мактаб ва боғчага хавфсиз қатнаши учун йўлаклар қуриш зарурлиги туман Кенгаши депутати Манзура Ҳайдарова томонидан кўтарилиб, амалиётга йўналтирилди. Шунингдек, маҳалладаги ташландиқ уйлар масаласи юзасидан фуқаролар мурожаати асосида чоралар кўриш вазифалари юклатилди.

Афросиёб маҳалласининг 300 та хонадон томорқасини сув билан таъминлаш мақсадида янги тикқудуқ қуриш таклифи депутат Темур Раззоқов томонидан илгари сурилди ва бу борада техник ўрганиш ишлари бошлаб юборилди.

Очиқ мулоқотлар давомида фуқаролар томонидан ижтимоий хизматлар сифати, маҳаллий инфратузилма, ёшлар бандлиги, аёллар фаоллигини ошириш каби масалалар бўйича билдирилган таклиф ва ташаббуслар инобатга олинди. Барча мурожаатлар депутат назоратига олиниб, тегишли ташкилотларга аниқ топшириқлар берилди.

Мазкур ташаббуслар O‘zLiDePнинг инсон манфаатларини устувор қўйиш, жойларда ислоҳотларга амалий таянч яратиш ҳамда фуқаролик назоратини таъминлашга қаратилган сиёсий иродасини яна бир бор ифода этди.