Ўзбекистон Республикаси Президентининг Самарқанд вилоятидаги Халқ қабулхонаси ва вилоят ҳуқуқ-тартибот идоралари раҳбарларининг навбатдаги сайёр қабули Жомбой туманида ўтказилди.

Унда Халқ қабулхонаси, вилоят суди, прокуратура, ички ишлар, адлия ва солиқ бошқармалари масъуллари, туман ҳокимлиги ва секторлар раҳбарлари иштирок этди.

Тадбир аввалида тумандаги маҳаллаларда “Ёшлар дафтари”га киритилган 27 нафар йигит-қиз, “Аёллар дафтари”га киритилган 20 нафар аёлга ўзини -ўзи банд қилиши ва доимий даромад манбаига эга бўлиши учун тикув машинаси, пишириқ пишириш печи, мотокультиватор сингари воситалар топширилди. Шунингдек, бўш иш ўринлари ярмаркаси ташкил этилиб, 135 та корхона ва ташкилот, тадбиркорлик субъекти томонидан ишсиз фуқароларга 500 дан ортиқ вакант иш ўринлари таклиф этилди.

– Тикувчилик бўйича касб-ҳунар ўрганганман, – дейди Гулноза Бозорова. – Лекин тикув машина йўқлиги сабабли бу иш билан шуғуллана олмаётгандим. Маҳалламиздаги хотин-қизлар фаоли ва ҳоким ёрдамчиси бандлигимни таъминлашга кўмаклашишини айтишганди. Мана бугун тикув машина берилди, энди ҳунар орқали рўзғор учун пул топишим мумкин. 

Ҳуқуқ-тартибот идоралари раҳбарларининг қабулида жомбойлик фуқаролар бузилган ҳуқуқларини тиклаш, ишга жойлашиш, уй-жойга эгалик ҳуқуқини расмийлаштириш, оила ва никоҳ, солиқ ва банк кредитлари масалалари юзасидан тегишли органлар масъулларига мурожаат қилиб, муаммоларига ечим топдилар. Зарур тавсия ва ҳуқуқий маслаҳат олдилар.

Жумладан, вилоят ИИБ бошлиғи Р.Маматовнинг қабулида бўлган Ойсара Бозорбоеванинг оилавий низони ҳал этиш, Ўктам Холмуродовнинг кредит масаласидаги мурожаати ижобий ҳал этилди. Пробация назоратидаги 5 нафар шахснинг белгиланган жазодан муддатидан олдин озод этиш тўғрисидаги аризаси қаноатлантирилди. 10 нафар ёшга ID-карта топширилди.

Сайёр қабул давомида қайд этилган ҳар бир мурожаатни белгиланган муддатда кўриб чиқиш ва имкон қадар ижобий ҳал этиш юзасидан масъуллар белгиланди.