Uchquduq tumanidagi “Kelajak” yoshlar markazida tuman hokimi Uchqun Yelmuratov hamda mutasaddi tashkilotlar rahbarlari ishtirokida oliy ta’lim muassasalarining bitiruvchilari bilan ochiq muloqot o‘tkazilib, yoshlarning muammolari va takliflari tinglandi va ularni joyida hal etish choralari ko‘rildi.

Tahlillarga ko‘ra, 2024-2025 o‘quv yilida tumanda jami 156 nafar yosh turli oliy ta’lim muassasalarini tugatgan. Ularning 58 nafari ish bilan ta’minlangan bo‘lsa, 98 nafari esa ish izlayotgan yoshlarni tashkil etadi.

Sayyor qabulda yoshlarga ARGOS tizimi haqida batafsil ma’lumotlar berilib, tizimining shaffofligi, natijalarning ochiq ko‘rinishda e’lon qilinishi va bu jarayon fuqarolarga teng imkoniyatlar yaratishi alohida ta’kidlandi. Test sinovidan muvaffaqiyatli o‘tganlarning ballari 3 oy davomida amal qilishi haqida tushuntirib o‘tildi.

52 nafar bitiruvchi ishtirok etgan tadbirda ularning aksariyati egallagan mutaxassisligi bo‘yicha ishlash niyati borligini bildirdi. Jumladan, pedagogika yo‘nalishini tugallagan 19 nafar yoshning 15 nafari maktabgacha va maktab ta’limi muassasalariga ishga joylashtiriladigan bo‘ldi. 4 nafari esa maktablarning tajribali o‘qituvchilariga “Ustoz-shogird” tizimi asosida biriktirilib, malaka va tajriba oshirish jarayonidan so‘ng ishga qabul qilinishi belgilandi.

Shuningdek, sayyor qabulda bir guruh yoshlarga turli ish o‘rinlari taklif qilindi.

– Joriy yilda Buxoro davlat texnika universitetining iqtisod fakultetini tamomladim, – deydi Farruxjon Mirzayev. – Bugungi uchrashuvda ishlash niyatim borligini bildirgandim. Menga tuman hokimligidagi bo‘sh ish o‘rni taklif etildi. Albatta, men 4 yil davomida olgan bilimim bilan bu ish o‘rniga loyiqligimni isbotlayman va menga bildirilgan ishonchni oqlayman.  

Sayyor qabulda qatnashgan barcha bitiruvchi yoshlarning murojaatlari asosan ijobiy hal etildi.