Buxoroda Mahallani qo‘llab-quvvatlash shahar kengashining 1-yarim yillik yakunlari bo‘yicha yig‘ilish bo‘lib o‘tdi. Yig‘ilishda mahallalarda ijtimoiy-ma’naviy muhitga salbiy ta’sir ko‘rsatuvchi holatlar jinoyatchilik hamda ularning sodir etilishiga imkon beruvchi sabab va shart-sharoitlarni bartaraf etish to‘g‘risidagi masala ko‘rib chiqildi.

Tanqidiy ruhda o‘tgan yig‘ilishda shahar hokimi Qurbon Tursunov “mahalla yettiligi” va mutasaddi rahbarlar mas’uliyatini oshirish va o‘z xizmat vazifalarini vijdonan bajarishlarini ta’kidladi.

Shuningdek, “Obod mahalla”, “Obod ko‘cha”, “Obod xonadon” mezonlari doirasida mahalla hududidagi ko‘chalarni obodonlashtirish, bunda yo‘l yoqasidagi maishiy chiqindilarni olish, aholining yo‘l yoqasidagi tomorqa maydonlarini turli begona o‘tlardan tozalanishi, daraxt va butalarni tartibga keltirishni tashkil etish, aholi xonadonlari fasad qismi va darvozalarini bo‘yash, mahalladagi yoshlar bilan alohida ishlash tizimini joriy qilish bo‘yicha fikrlar o‘rtaga tashlandi.

Shu bilan birga, ishsizlar, mehnat bozoriga kirib kelayotgan yoshlarni bandligini ta’minlash, og‘ir toifadagi yoshlar bilan individual ishlarni olib borish, yoshlarning qiziqishidan kelib chiqib xorijiy tillarga yo‘naltirish va kasb-hunarga o‘qitish choralarini ko‘rish, oilaviy ajrimlar soni ko‘p qayd etilgan mahallalarda alohida tanqidiy muhokamalarni tashkil etish, nikohdan ajralish holatlarini kamaytirish bo‘yicha targ‘ibot tadbirlarini jonlantirish bo‘yicha mas’ullarga tegishli ko‘rsatmalar berildi.