Respublika ishchi guruhi tomonidan Buxoro viloyatida vazirlik va tashkilot rahbarlarining sayyor qabullar o‘tkazilmoqda.

Buxoro shahridagi Kasbiy ko‘nikmalar markazida o‘tkazilgan qabul Buxoro hamda Kogon shaharlari, Kogon va Qorovulbozor tumanlari aholisi uchun tashkil etildi. Unda Prezident Xalq qabulxonalari, Oliy sud, Bosh prokuratura, Ichki ishlar, Adliya, Kambag‘allikni qisqartirish va bandlik, Maktabgacha va maktab ta’limi vazirliklari hamda boshqa qator markaziy idora va tashkilotlar mas’ul rahbarlari, shuningdek, viloyat va shahar hokimliklari mutasaddilari ishtirok etdi.

Qabul jarayonida fuqarolarning ijtimoiy-maishiy, huquqiy va boshqa dolzarb muammolari eshitildi. Shuningdek, ommaviy sayyor qabulda kadastr, bandlik, qishloq xo‘jaligi, elektr va gaz ta’minoti, uy-joy olish kabi turli yo‘nalishlardagi murojaatlar yuzasidan fuqarolar mas’ullardan yechim izladi.

O‘zbekiston Respublikasi Oliy sudi mas’ul xodimi M.Tojiboyev, tomonidan sayyor qabulda jami 40 nafar fuqarolar qabul qilindi. 

Unda fuqarolarning 9 nafari jinoyat, 21 nafari fuqarolik ishlari bo‘yicha, 1 nafari iqtisodiy hamda 9 nafari ma’muriy masalalar bo‘yicha murojaat qildi. Murojaatlarning 32 tasi bo‘yicha huquqiy tushuntirish berildi. 2 ta Oliy sud raisi qabuliga kirish haqida ariza, 1 ta ma’muriy ishini boshqa viloyatga o‘tkazish to‘g‘risida, 5 ta taftish tartibidagi shikoyat Oliy sud tomonidan o‘rganish uchun qabul qilindi.

Taqdimnoma va iltimosnomalar asosida ozodlikdan mahrum qilish va axloq tuzatish ishlari jazosini o‘tayotgan 7 nafar mahkum jazoni o‘tashdan muddatidan ilgari shartli ravishda ozod qilindi. Shuningdek, 16 nafar fuqaroning MJtKning 315, 316-moddalari bilan bog‘liq ishlar ko‘rilib, murojaatlarning barchasi qanoatlantirildi. 

Fuqarolik ishlari bo‘yicha sudlar tomonidan oilaviy nizo sababli alohida yashayotgan va nikohdan ajratish haqida sudga murojaat qilgan 6 ta fuqarolik ishini ko‘rish jarayonida ajrashish yoqasiga kelib qolgan oilaga tushuntirish ishlari o‘tkazilishi natijasida 8 nafar voyaga yetmagan farzandi bo‘lgan oila yarashtirildi.

Pensiya va nafaqa olish maqsadida murojaat qilgan, ammo, hujjatlaridagi xato va kamchiliklar sababli pensiya tayinlanmayotgan 2 nafar shaxsning hujjatlarni tegishli ekanligi fakti belgilanib, ushbu fuqarolarning muammosi ijobiy hal qilindi.

Bu kabi sayyor qabullar aholi bilan ochiq muloqotni ta’minlash, muammolarni joyida hal etishda muhim ahamiyat kasb etmoqda.

Respublika ishchi guruhining sayyor qabuli viloyat bo‘ylab davom etmoqda.