Ma’lumki, har qanday bahsli masalaga adolatli yechim faqat odil sud tomonidan topilishi kerak. Sababi, sud idorasiga ishi tushgan har bir shaxs ushbu dargohda qonun va adolat ustuvor ekaniga ishonch hosil qilishi lozim.

Bugungi kunda huquqbuzarlik va nizolar turlarini tahlil qilish asosida ishlarning asosiy qismi sayyor sud majlislarida ko‘rib chiqilmoqda.

Olmazor tumani Yoshlar markazida Yoshlar ishlari agentligi Olmazor tumani bo‘limi yetakchilari hamda Jinoyat ishlari bo‘yicha Olmazor tumani sudi sudyalari ishtirokida bo‘lib o‘tgan sayyor sudda ham dolzarb mavzular ko‘rib chiqildi.

Xususan, Jinoyat ishlari bo‘yicha Olmazor tumani sudi sudyalari V.Karamanov, A.Turg‘unov hamda S.Shodmonovlar ishtirokida soxta tadbirkorlik bilan shug‘ullanib, savdo qoidalarini buzgan, soliqlarni o‘z vaqtida to‘lamagan 1997 yilda tug‘ilgan MCHJ rahbariga nisbatan jinoyat ishi ko‘rib chiqildi.

Dastlabki tergov idoralari tomonidan unga Jinoyat kodeksining bir qator moddalari bilan ayblov e’lon qilingan. Sayyor sudda sudlanuvchiga Jinoyat kodeksining 59-moddasi tartibida tayinlangan jazolarni qisman qo‘shish yo‘li bilan uzil kesil o‘tash uchun ish haqining 15 foizi miqdorini davlat daromadi hisobiga ushlab qolgan holda 2 yil muddatga axloq tuzatish ishlari jazosi tayinlandi.

Shuningdek, sudda yo‘l transport hodisasi bilan bog‘liq ma’muriy ish ham ko‘rib chiqildi. 

Sudyalar tomonidan yoshlarga sud-huquq tizimidagi islohotlar, sudlardagi ochiqlik va shaffoflik, tumanda yoshlar ishtirokida sodir etilayotgan jinoyatlar holati yuzasidan ma’lumot berildi.