O‘zbekiston Respublikasi Sudyalar oliy kengashi tomonidan Jizzax viloyatida sudyalar va ularning oila a’zolari bilan uchrashuv o‘tkazildi.

Tadbirda mamlakatimizda korrupsiyaga qarshi kurash borasida olib borilayotgan islohotlar, sudyalarning xizmat mavqeidan shaxsiy manfaatlari yo‘lida foydalanmasliklari, ular odob-axloq me’yorlariga qat’iy rioya qilishlari, odil sudlovning obro‘siga salbiy ta’sir ko‘rsatishi mumkin bo‘lgan xatti-harakatlardan o‘zlarini tiyishlari lozimligi ta’kidlandi.

Bu borada Prezidentimiz tomonidan sudyalarning chinakam mustaqilligini ta’minlash, tizimda korrupsion omillarni bartaraf etishga qaratilgan qator hujjatlar qabul qilinganligi, joriy yilning 5 mart kuni Yurtboshimiz raisligida o‘tkazilgan Korrupsiyaga qarshi kurashish bo‘yicha milliy kengash yig‘ilishidan keyin Oliy sud raisi B.Islomovning sudyalar va sud xodimlariga yo‘llagan murojaaatida korrupsiyaga qarshi murosasiz munosabatda bo‘lish kerakligi ta’kidlangani ham sud tizimida korrupsiyaga mutlaqo o‘rin yo‘qligi, unga qarshi barcha birdek yagona kuch bo‘lib harakat qilishi zarurligini ko‘rsatadi.

Tadbirda viloyat sudi faxriylar kengashi raisi Mitanboy Ravshanov, viloyat sudining sudyasi Qahramon Xolmurodov so‘zga chiqib, sud tizimida amalga oshirilayotgan islohotlar, sudyalar uchun yetarli imkoniyatlar, ijtimoiy kafolatlar yaratilganligi, ularning korrupsiya, ta’magirlik kabi illatlarga qo‘l urmasligi, buning uchun esa, eng avvalo, sudyalar oila a’zolarining o‘rni muhimligini alohida ta’kidlab o‘tishdi.