Samarqand viloyat hokimi vazifasini bajaruvchi A.Boboyev va viloyat sektorlari rahbarlari Kattaqo‘rg‘on tumanida sayyor qabul o‘tkazdi.

Viloyatga rahbar etib tayinlangan A.Boboyev shu paytgacha barcha tuman va shaharlarda bo‘lib, aholi bilan ham uchrashgan, Samarqand shahrida tadbirkorlar uchun qabul o‘tkazgan bo‘lsa-da, bu ilk sayyor qabul bo‘ldi. 

Hududiy tarzda Kattaqo‘rg‘on, Ishtixon, Narpay, Paxtachi tumanlari va Kattaqo‘rg‘on shahri aholisi uchun tashkil etilgan qabulda fuqarolar turli masalalar yuzasidan viloyat rahbarlariga murojaat qildi.

Murojaatlarning asosiy qismini yer va mol-mulkni rasmiylashtirish, kadastr hujjatini tayyorlash, sud qarorlarining ijrosi, aliment undirish va hududlardagi infratuzilmani yaxshilash bilan bog‘liq masalalar tashkil etdi.

Qabulda viloyat boshqarma va idoralari, tashkilotlar rahbarlari ham ishtirok etgani bois aksariyat murojaatlar tegishliligi bo‘yicha mas’ullarga yo‘naltirildi va shu yerning o‘zida hal etish choralari ko‘rildi. O‘rganish va vaqt talab qiladigan muammolar bo‘yicha muddat belgilanib, nazoratga olindi.

Ma’lumotlarga ko‘ra, sayyor qabulda 332 ta murojaat qayd etilgan.

Viloyat sektorlari rahbarlarining navbatdagi hududiy sayyor qabuli 24 yanvar kuni Payariq tumanida o‘tkazilishi belgilandi.