Ayrim aholi xonadonlari hovlisida elektr simlari ustunlari o‘rnatilgani bois shamol bo‘lganda elektr ta’minotida ko‘plab uzilishlar sodir bo‘lib, xavfli vaziyatlar yuzaga kelgan. Bu masalada mutasaddilarga qilingan murojaat esa e’tiborsiz qolgan.

Shu sababli, Izboskan tumani “Toshloq” mahalla fuqarolar yig‘ini hududidagi Ziyolilar ko‘chasida yashovchi aholi elektr simlari ustunlarini hovlidan tashqariga ko‘chirish masalasida senatorga murojaat qildi.  

Senatning Mudofaa va xavfsizlik masalalari qo‘mitasi raisi Qutbiddin Burhonov hudud aholisi bilan uchrashib, vaziyatni o‘rgandi.  

Murojaat yuzasidan olib borilgan amaliy ishlar natijasida muammo bartaraf etildi. Elektr simlari ustunlari soha mutaxassislari tomonidan ko‘cha hududiga o‘rnatildi.  

Senatorlarning joylarda saylovchilar va aholi murojaatlarini qonun doirasida ijobiy hal qilish ishlari davom etmoqda.